مووزەێ سان‌وێنە دە ئیلام سامان وەێ ددرێ
شەفەق نیوز- بەرپرس میرات فەرهەنگی و گەشتیاری ئیڵام وت: ئی مووزە ک نۆسەد و سێ قەڵ کوچگ گەور ها دەێ، دە وتاخێ سەد متری دە سازمان فەنی حرفەئی نریاگە، وەێ زووەێلە سەر و سامان ددرێ و ئی مووزە ئەڕا یە بنەڕاێ نریاگە ک دووسخوازەێل زەمین‌ناسی و زاڕوو مەدرەسەێلە بچنە وەورەێلە.
دە ئی مووزەڵە، بڕێ لە سان‌وێنه‌ێل و بەرد و چنگ پەریەێلێ ک دە کەش و کێوە و بیاوانەێلەێ ئیلام پەیدا کریانە و فوسیلەێلێ چەن هزار ساڵەن کریانەسە دی.
ئوستان ئیلام لە جارانەو پڕە لە کوچگەێلێ ک دوویشن فوسیل گژ و گیاێل و گیانەوەرەێلێ چەن هزار ساڵە و چەن ملیوون ساڵەن ک مردنە و لار و لەشێیان جوور نەخشێگ چەوسیاگەسە قەێ کوچگەێلە و لە قەێ نەدکنرن.
بڕێ وتنە دە زوونان، ئیلام و بەش فرەیێگ لە زاگڕوس، گشتێ دە ژێر ئاو و ئوقیانووس بییە.
ئەوسا دە فەرهەنگ عامەێ کورد، کەێوانووەێلە ئی چنگ‌پەرییەێلە دنان دە نام گوونی ئارد و گەنم و جۆ و برنج و ماش و نژی و نخە و چشتەێلێ لەێ‌وا، تا رابگرێگ و پیت و بەرەکەتێ نەپەڕێ.
ئەوان دوتن ئیجووور نەخشێ دە قەێ ئی‌چوونە بەردێ، هن یەسە ک پەری و ساهڵ واهڵەێل خەێر دەس ئەڵەێ وەشاننەو مڵاکەت خەێر چنگ کوتاگەسە قەێ و ئەڕا یەسە ک پیت دیرێ و چەم گەن ئەڵەێ کار نەدکەێ.
