وەناوبانگترین مۆزەخانەیل مووم لە جهان دڵنگەیل پەیکەر تڕامپ ئاڵشت کەێد

شەفەق نیوز/ جوور گامیک ئاماژەیی نشان کۆتایی ماوەی حوکومڕانیی دەێد، وەڕێۆبەرایەتی مۆزەخانەی وەناوبانگ مەدام توسو لە لەندەن پڕیار ئاڵشتکردن دڵنگەیل پەیکەر موومین دۆناڵد تڕامپ دا، و کردەی تاخمیک وەرزشی ئەرا بازی گۆڵف.

ئی گامە لە دویای راگەیانن کاندید دیموکراتی جۆ بایدن لە سەرکەفتنی لە هەڵبژاردنەگان، رووژ شەممە، دویای ئەوەگ دەنگەیل وەلایەت بنسلڤانیا ئەرا خوەی یەکلاوە بوی.

وەرجەیە، دڵنگەیل تڕامپ لە مۆزەخانەی مەدام توسو وە دریژایی ماوەی سەرۆکایەتیەگەی قات سیایگ لە وەری بوی، بەڵکم ئی قاتە رووژ شەممە ئاڵشت وە دڵنگەیل گۆڵف کریا، ئەو وەرزشیە ک تڕامپ خوەشی لەلی تیەێد.

تڕامپ لە وەخت راگەیانن ئەنجامەیل هەڵبژاردنەگە لە یەکیگ لە سەیرانگەیلی لە وەلایەت فرجینیا خەریک بازی گۆڵف بوی.