گوڵ شەقایق چارەسەر بیماری بکوشیگ کەێد
شەفەق نیوز/ لە تۊژینەوە پزیشكیگ دەرچگە، گوڵ شەقایق توەنێد جۊر چارەسەریگ بوود ئەرا بیماری مەلاریا، ک یەکیگە لە بیماریە بڵاوەیلەی وڵاتەیل کڕ کەمەرەیی و نیمە کەمەرەیی زەۊی.
وەگورەی ئامار فەرمییگ ڕێکخریای تەندروسیی جەهانی، لە ساڵ 2020 ، لەجەهان 241 ملیۆن کەس تۊیش مەلاریا هاتنە و لەو شمارە وەلایەن کەم 627 هەزار کەس گیان لەدەسدانە، تا ئیسە ئامارەیل ساڵ 2021 نیە ور دەس.
تۊیژینەوەی نوویگ وەهاوبەشی لە مابەێن زانکۆەیل ئەڵمانیا، هیندستان و ئەسیوپیا ئەنجامدریا، دەرچگە، گوڵ شەقایق توەنێد بوودە چارەسەر ئەرا بیماری مەلاریا، وەگەرد ئەوە ک زانایەیل نەرەسینەسە هۊردەکاری ئەوە ک کام لە پێکهاتە ناو گوڵەگە چارەسەرەگە ئەڵگردیە و کاریگەریی لەبان بەکتریای بیماریەگە دروسکەێد.
تۊژەرەیل لە تۊیژینەوەیلیان چارەسەرەیل مەلاریا و گوڵ شەقایق وەکارهاوردنە ئەرا شمارەیگ مۊش دۊیای ئەوەی تۊیشکریان وە بەکتریای مەلاریا، وە جۊریگ، بەشیگ لە مۊشەیلە چارەسەر کلۆرۆکین ئەرایان وەکارهاوریا، ک چارەسەر کاریگەریگە لەبان مەلاریا، بەشیگتریان گوڵ شەقایق ئەرایان وەکارهاوردن.
لە ئەنجامەیلە دەرچگە ئەو مۊشەیلە گوڵەگە ئەرایان وەکارهاتیە کێشیان کەمتر داوەزیە و کەمتر پلەی گەرمیی لەشیان بەرزەوبۊیە، نیشانەیلتر بیماریەگە زیاتر جێگیر مانە وەچەو ئەوانەیتر، ک وەرەو خەراوتربۊین چگنە.
