تەندروسی عراق هووشداری نوویگ دەربارەی بڵاوبوین بنچینەی نوو کۆڕۆنا دەێد
شەفەق نیوز/ وەزارت تەندروسی وژینگەی عراق، ئمڕوو شەممە، هووشداری دا لە هاتنەوەی بەرزەوبوین رێژەی تووشهاتنەگان وە ڤایڕۆس کۆڕۆنا لەوەر خەمسەردی خەڵکەگە لە ریکارە مقەیەتیەگان وەگەرد بڵاوبوین بنچینە نووەگەی پەتاگە لە دەوڵەتەیل ناوچەگە ولە جهان.
وەزارەتەگە لەبەیانامەیگ رەسیە ئاژانس شەفەق وت: وە ووردی چەودیری لە هەڵوێست مەترسیدار پەتاگە لە تووشهاتنەگان کۆڤید-١٩ و مردنەگانی لە ئەمریکا و دەوڵەتەیل یەکێتی ئەوروپا و بەریتانیا و چەن دەوڵەتیگ لە ناوچەکە کەێد، ک جیاوازە لە زوی بڵاوبوینی و تووشهاوردن گشت چینە تەمنیەگان و مناڵیش لەلیان، ک هەڕەشەی سیستەم تەندروسسیان دەێد لە کەڵک بوین تووشهاتنە مەترسیدارەگان، ئەراوە ئەو دەوڵەتەیلە ناچار بوین گشت دامەزراوەگان بوەسن، و قەیەغەی چالاکیە بازرگانی و کۆمەڵایەتیی و رووشنهویریەگان بکەن، تا مقەیەتی ژیان هاووڵاتیەگان بکەن و مردنەگان کەمەو بکەن.
بەیاننامەگە وتیش؛ خاسەوبوین هەڵوێست پەتاگە وەشیوەی گەورایگ لە عراق وەرانوەر زیایبوین رێژەیل خاسەوبویەگان و داوەزین ژمارەی مردنەگان، وڵاتەگەمان بی وەی نێکەێد لە مەترسی بەرزەوبوین ژمارەی تووشهاتنەگان یەکجار تر، لەوەر وەردەوامی گەشتی عراقیەگان و بیگانەگان لە عراق و وەپێچەوانەیش، ک هیلێد بڕیگ لە ریکارە مقەیەتیەگان بوەیمن ئەرا مقەیەتیکردن هاووڵاتییەگامن ئەرا نواگردن لە وەناوهاتن بنچینە ئاڵشتبویە نووەگان لە ڤایڕۆسەگە.
وەزارەتەگە ئاماژە کرد لە رەوانگەکردن تیمەیل تەندروسی لە بەغداد و پارێزگاگان لە خەمسەردی گەورایگ ئەرا پابەندی وە ریکارە مقەیەتیەگان جوور دەمامەک و دویرەوکەفتن کۆمەڵایەتی و دەس تەمیسکردن، و هاتنەوەی پیشەیل جارانی جوور دەس سەنین و باوشی و ماچکردن.
و جەختکرد ک ئی ئامازەیلە فرە مەترسیەدارن ک هووشداری لە هاتنەوەی بەرزەوبوین تووشهاتنەگان دەێد، دویای دەرکەفتن بنچینە نووەگان، و بایەدە مەترسی ئەو رەفتارەیل کۆمەڵایەتیە وەهویر بخەێمن، ک وەشیوەی گەورایگ هاوکاری لە گواستەوەی پەتاگە دەێد.
وەزارەت تەندروسی داوا لە هاووڵاتیبەگان کرد هووشدار بوون و ئاگادار لە گرنگی وەردەوامی وە پابەندبوین وە ریکارە مقەیەتیەگان بوون وەتایبەت وەکارهاوردن دەمامەک و دویرەوکەفتن کۆمەڵایەتی و تەمیسکردن دەسەیل و دویرەوکەفتن لە قەرەباڵغی، ئەرا نواگردن لە دووارە بەرزەوبوین تووشهاتن ومردنەگان، ئیجا ناچار بویمن ریکارە سەختەگان لە قەغەی گشتگیر لە وڵاتەگە بوەیمن و بەسانن شوونەیل گردەوبوینەگان.
