هیندیستان گەپترین سەنتەر یۆگا لە جەهان وازکەێد
2023-12-21T09:06:29+00:00
شەفەق نیوز/ سەرۆک وەزیرەیل هیندیستان نارێندرا مودی گەپترین سەنتەر یۆگا لە جەهان وەناو "سوارڤید مەهامەندیر” لە شار ڤاراناسی وازکرد کە وەە شاریگ پیرۆز یا شار مردگەیل ئەرا هیندیەیل دانرێد.
سەرۆک وەزیرەیل لە پەیج خوەی لە تووڕ کۆمەڵایەتی بڵاوکرد، جویر ئەوەگ وەلایەن ANI بڵاوکریایە، پەرستگای سوارڤێد مەهاماندی کە وە لەوەرچەوگردن تەلارسازی نەریتی و مۆدێرن لە هیندستان دروسکریایە، توەنێد تا ٢٠ هەزار کەس بگرێدەخوەی، ئەی کۆمەڵگەیە هەفت نهۆمییە جویر پەرستگا و سەنتەری یۆگا کارکەێد، وەلایەن شوینکەفتیەیل ڤیهانگام یۆگا دروسکریایە، کە بزووتنەوەیگ رۆحییە و لە ساڵ ١٩٢٤ وەلایەن گورو ساداڤاڵ دیۆ جی مەهاراج دامەزرا.
ساڵانە ملیۆنان کەس سەردان شارەگە کەن، چوینکە زیارەت ئەرا ڤاراناسی گرنگە ئەرا ئەنجامداین رێوڕەسمەیل ئاینی.
