شیوەی خواردن کاریگەری لەبان لەش دیرێد
لە توێژینەوەیگ ک لە زانکۆی هیرۆشیمای ژاپۆن بڵاوکریاگە، پسپۆڕەیل بڕیگ بەشداربوی لەبان سێ گرووپ بەشکردن، بڕیگیان وە تونی نان خوەن، بڕیگیانیش وە یەواشی و کۆتا گروەگەیش وە شیوەی سروشتیگ نان خوەن، تا کاریگەری شیواز خواردن لەبان لەش بزانن.
وەپای لێکۆڵینەوەگە لە سەرەتا هویچ کام لە گرووپەیلە نیشانەی بیماری یان لەری لەلیان دەرنەکەفتیە، باوجی دویای پەنج ساڵ شارەزایەیل دیاریکردنە، ئەو کەسەیلە وە تونی نان خوەن ئەگەر تویشهاتن وە بەرزە فشار خوین و کیش زیادی و تێکچگن چەورییان وە رێژەی لەسەدا 89 زیاترە.
لە توێژینەوەگە ئاشکەرایکردیە ئەو کەسەیلە وە زویوەزی نان خوەن تویش چاخی تێن چوینکە هەس وە تیر بوین نیەکەن هەر لەوەر ئیە فرەتر لە خوازین خوەی خوەێد.
دکتۆر "تاکایوکی یاماجی"، سەرۆک توێژینەوەگە ئویشێد،" خواردن هەڵەپەڵە بوودە هووکار بەرزبوین ئاست گلۆگۆز ئیەش بوودە هووکار وەرگیری ئەنسۆلین".
ئویشێد وە یەواشی نان خواردن دەسمیەتیدەرە ئەرا تەندروسی خاسیگ و وە گاز بویچگ خوەراکەگە بخوریەد وە تەوای بجایدەی، چوینکە ئی شیوازە دەسمیەتیدەرە ئەرا خواردن تەندروس و مقیەتیکردن لەش وە ریکی.
