دەسگیرکردن رۆبۆتیگ وە توومەت "چزداین سێکسی" لە ئەڵمانیا

شەفەق نیوز- وەدویاچگن

پۆلیس لە شار کۆلۆنیا لە ئەڵمانیا، رووژ سێشەممە، راگەیان لە دەسگیرکردن رۆبۆتیگ وە توومەت "دەسدریژی سێکسی" لەبان دۊتە ناخاڵەیگ کە تەمەنی 16 ساڵە.

وەپەی ئەو قسە و باسەیلە کە بڵاو بۊنە، رۆبۆتەگە، کە باڵای نزیکەی 1.20 مەترە، دۊای نیمەشەو لە وەردەم چێشتخانەیگ ئەرا خواردەمەنییە خێراگان لە پشتەو نزیکەو بۊە لە دۊتەگە، و دەس لەلی داگە، و وە جۊلەیل سێکسی وەلیەو کردگە.

توومەتەیل لەبان خاوەن رۆبۆتەگە توومار کریان، کە کوڕە ناخاڵەیگە و تەمەنی رەسێدە 16 ساڵ، وەرد برادەری کە تەمەنی رەسێدە 19 ساڵ، وە پەخشکردن راتەوخۆی دەسدریژییەگە لەڕی بەرنامەی "تیک تۆک"ەو.

 پۆلیس رۆبۆتەگە لەناو سندووق ماشینیگ لە جۊر ڤۆلکسڤاگن پەیا کرد، و هەرلیوا دەس گردە بان موبایلەیل هەردوگ گومانلیکریاگەگە و رۆبۆتەگەیش، و لێکۆڵینەوەیگ واز کرد ئەرا زانستن چوینیەتی جیوەجیکردن تاوانەگە و ئایا یەکیگیان کۆنترۆڵ جۊلەیلی کردگە یا نە.

 پۆلیس وینەیگ فەرمی ئەرا رۆبۆتەگە دەرکرد کە لەناوی دیارە لەبان زەوی دریژەو کریاس، دەمچەوی وە چەویلکەیگ تاوسانان پووشیاس، وەرد سیوڵ سییە، و کوتریگ چەرمگ بی باڵ لەوەر کەێد وەرد زنجیریگ رەنگ زەڕین کە ساختە دیارە.

 پسپۆڕەیل هوشداری دان لە توانای هاککردن ئی رۆبۆتەیلە ئەرا باجسەنین لە خاوەنەیلیان یا ئازارداین لەشییان، تا رەسێدە کوشتن.

لەی چوارچیوەو، جەیک موور، راویژکار ئاسایش سایبەری (ئەلکترۆنی) لە یەکیگ لە کومپانیا ئەڵمانییەیل، دیاری کرد کە ئەو کامێرایەیلە کە هانە ناو ئی ئامرازەیلە توانا داشتوود هاک بکریەن ئەرا کارەیل باجسەنین، وە مدوو ئەوەگ شایەت کامێرایەیل بەهاداریگ لەخوەی بگرێد ئەرا تاوانبارە ئەلکترۆنییەیل.