جگارەکیشان هەر ساعەتیگ ٣ کەس لە عراق کوشێد
شەفەق نیوز/ سایت پزشکی "میریفا" وت: جگارەکیشان هەر ٢٠ خولەک یەک عراقی کوشێد، و رووژانە زیاتر لە یەک مەلیۆن دینار وەخەرج جگارە چوود.
ئەو سایتە ک تایبەتە وە خەوەرەیل پزشکی، و بارەگای هالە هۆنگ کۆنگ، لە راپۆرتەگەی لە زوان سەرۆک نویسینگەی دژە تەماکوو سەروە وەزارەت تەندروسی عراق عەباس جەبار ساحب ئویشێد: ئامارەیل ریخریاگ تەندروسی جەهانی نشان ئەوە دەێد ک هەر ٢٠ خولەک یەک جگارەکیش عراقی مرێد.
ئەو راپۆرتە ک لەژیر ناونشان "جگارەکیشان عراق کوشێد" بڵاوی کردیە وئاژانس شەفەق نیوز ئەڵگەردانی کرد، وت: خەرج جگارە لە رووژیگ لە عراق رەسێدە ١،٣٦٧،٠٠٠ دۆلار، لە وەختیگ ک سایت "ئەتلەس تەماکوو" ئەرا نەیشتن جگارەکیشان ئویشێد: جگارەکیش عراقی هەر ساڵیگ ١،٢٤٣ جگارە کیشێد.
راپۆرتەگە وتیش: یاسای دژە جگارەکیشان لە عراق کۆنەوە بویە، وبایەتە لە نووەو بنویسیەێد ئەرا پاڵپشتیکردن مقەیتی تەندروسی گشتی، وتیش؛ یاساگە قەیەغەی جگارەکیشان لەناو گواستنەوەی گشتی کەێد.
باوجی نشان ئەوەیش دا ک لە هویرمان جگارەکیشەیل عراق، یاساگە چمای ننیەسی، چوینکە جگارەکیشان وەشیوەی فراوانیگ باوە، و باج پێشیلکردن جگارەکیشان لە شوینەیل بەسیاگ رەسێدە ١٠ هەزار دینار عراقی.
ڕاپۆرتەگە وتیش: لەیاسا پڕۆپاگەندەی بەرهەمەیل تەماکوو یا چەودیریکردنی وەهەر شیوەیگ قەیەغەس.
وەگورەی ریخریاگ تەندروسی جەهانی؛ ٨٠% لە ١،٣ ملیار جگارەکیش لە جەهان هانە دەوڵەتەیل ئەوزەڵکار ئابووری، و جگارەکیشان بوودە هووکار مردن ٨ ملیۆن کەس لە ساڵیگ، وبوودە هووکار تویشهاتن وە کانسەر وبیماری دڵ ولویلەیل خوین.
ئەڵگەردان: ئاژانس شەفەق نیوز
