بازاڕ ماشین کۆری داوەزێد

شەفەق نیوز/ بازاڕ ناوخوەیی ماشین لە کۆریای باشوور، ماوەی ساڵ گوزەشتە، رەسیە خوارترین ئاستی لە دە ساڵ گوزەشتە تا ئیسە، لەوەر داوەزیان داواکاری لەناوەین گەنج و کارمەنەیل، وەگورەی راپۆرتیگ پیشەسازی حکومەتی، ئمڕوو دووشەممە.

لە شیەوکردن ساڵانەی بازاڕ ماشین، کۆمەڵەی دروسکەرەیل ماشین کۆریای باشوور وت: فرووشەیل ماشین نوو رەسیە 1.64 ملیۆن یەکە لە ساڵ 2024، وە داوەزیان 6.5 لەسەد لەساڵ 2023، کە خوارترینە لە ساڵ 2013 تا ئیسە.

فرووش ماشین لەناو کۆریا وەڕیژەی 7.3 لەسەد وەرانوەر 1.35 ملیۆن یەکە،  لە وەختیگ فرووشەیل ماشین هاوردە وەڕیژەی 1.5 داوەزیا ئەرا  288 هەزار یەکە، وەگورەی ئاژانس "يونهاب" کۆریای باشووری.

وەگەرد داوەزیان بڕ فرووشەیل، نرخ سەنین ماشین نوو وەڕیژەی 2.3 لەسەد بەرزەو بوی، لە بنەمای ساڵانە ئەرا 50.5 مليۆن وون (نزیکەی 35162 دۆلار ئەمریکی)، کە نشان رویکردن وەرەو سەنین ماشین گران دەێد.

دیاری کرد کە بەرزەوبوین قەرز خیزانەیل، و کۆتاییهاتن وە بەرنامەی پاڵپشتیکردن حکومەتی ئەرا سەنین ماشین نوو، و یەواشی لە داواکردن ماشینەیل کارەبایی، بوینەسە هوکار سەردی بازاڕەگە.

کۆمەڵەگە داوا لە حکومەت کرد ریکارەیل وەرجەوەختە جیوەجی بکەێد تا داواکاری زیایەو بوود.