وسیان ناڕەزایی و خوەینشاندان لە سلێمانی.. وینە

خاوەن بڕوانامە

قسەکەر خاوەن بڕوانامەیل باڵا، شوان محەمەد، لە کۆنگرەیگ رووژنامەوانی کە ئاژانس شەفەق نیوز ئامادەی بوی، وت: یە ٥ ساڵە هویچ دەریگ لە وەردەم ئیمە نەمەنیە نەکوتایمنە، تا جویر هاولفەیلمان مافەیلمان وەدەسمان بکەفێد، وتیش:  ١٥ گلە سەردان وەزارەت خوەنستن باڵا و توێژینەوەی زانستی لە هەرێم کردیمنە، و ٨ گلە  ئەرا ئەنجومەن وەزیرەیل، بیجگە لە 6 گردەوبوین وەگەرد وەزارەت دارایی، بەڵام وەبی هویچ وەڵامیگ.

محمد وتیش؛ هەرچەن فەرمان و بڕیارەیل ئەنجومەن وەزیرەیل هەرێم لەی بەشە دەرچگە، ک (بڕیار 170 لە 7/9/2022) و (بڕیار 178 لە 10/21/2022)، باوجی ئەو دوو بڕیارە نەڕەسینە ئاست جیوەجیکردن.

وتیش: شمارەیان فرە نیبە،  کە لە هەزار خاوەن بڕاونامەی باڵا زیاتر نیبن،  و بایەسە حکومەت هەرێم سوودمەن بوود لە بڕیارنامەی حکومەت فیدراڵی شمارە 59 ساڵ 2017 ئەرا دەسنیشانکردن خاوەن بڕوانامەیل باڵا لە سەرتاسەر عراق.

خوەینشاندەرەیل زوور لەوە کردن کە ئەگەر داواکارییان ئەرا دامەزراننیان جویر هاولفەیلیان لە ناوەند و باشوور جیوەجی نیەکریەێد، پەنا بەنە کارەیل مەدەنی ئەرا داوای مافەگانیان.

 دوکانەیل

هاووەختیش دەیان خاوەن دوکان لەوەردەم سەرۆکایەتی شارەوانی سلێمانی خوەینشاندان کردن، ئەرا نشاندان ناڕەزایی وەرانوەر بڕیار ریگریکردن لە نمایشکردن کەلوپەلیان لەوەردەم دوکانەیلیان.

شوان غەفور مەحمود، نویەنەر ئەو خاوەن دوکانەیلە ئەرا ئاژانس شەفەق نیوز وت: شارەوانی سلێمانی ریگری لە نمایشکردن چشتەیلمان لەوەردەم دوکانەیلمان کەێد لە چوارچیوەی ئەو شوینە یاساییە کە لەلایەن خوەیەو وەپیان بەخشیە، کە رەسێدە ٧٠ سم.

مەحمود وتیش: ئیمە خاوەن دوکانەیل جادەی گەڕەک بەختیاریین، شمارەمان نزیکەی 150 دوکانە، و ئەرا زانیاری کە ئەو  ناوچەیلتر لەلایەن شارەوانی سلێمانیەو وەیجویرە وەپیان نەکریاگە، داوا لە پارێزگار سلێمانی و شارەوانی سلێمانی کەیمن  واز لەی بڕیارە بارن، چوینکە زیان وە خوەیان و کاروباریان رەسنێد.