وێنە.. وەفر سلێمانی پووشێد و گەشتیارەیل وەرەو خوەی کیشێد
شەفەق نیوز/ ناوچەیل وەفروارین لە سلێمانی، کەشوهەوای خوەشیگ لەلای خەڵکەگەی و گەشتیارەیل پەیا کردگە، ک ئەرا دڵخوەشی وە سیمای رەنگین زمسانی تیەن. ئارام ئەحمەد خەڵک سلێمانییە ئەرا ئاژانس شەفەق نیوز ئۊشێد: خوەی و خیزانەگەی هاتنەسە کۊیەی ئەزمەر تا وەی سیمای رەنگینە دڵخوەش بوون.
عەلی لە پارێزگای بابل هاتگە، ئەرا ئاژانس شەفەق نیوز ئۊشێد: کەشوهەوای سلێمانی مەردمەگە خوەشهاڵ کەێد و گەشتیارەیل وەرەو خوەی کیشێد، تایبەت لەی مەوقەیلە چۊنک٢ سیمای وەفروارین ئەرا ئیمە لەی وەرزە جۊر پەنایگە.
هەمیش ئۊشێد: لە گشت ساڵیگ خوەی و برادەرەیلی ئەرا وەسەربردن وەختەیل خوەشیگ تیەنە سلێمانی وەرەو کۊیەیلە و شۊنەیل شارەگە ک وەفر پووشیەسەی.
خوەشیەگە تا سەر نەۊی
باوجی وەفروارین لە ئاوایەیل سلێمانی کردەوەیگ تر داشت، لەوەر سەختی سەردیەگە و کەمی چشتەیل گرمەوکرد، ئەراوە حاجی ئەحمەد ئەرا ئاژانس شەفەق نیوز ئۊشێد: کەمی سوتەمەنی و کارەبا هیشت بڕیگ دارەیلە بووڕن تا لە وەرز وەفروارین خوەیان گەرمەو بکەن،.تایبەت لە ناوچەیل کۊیەیلە، و داوا لە حکومەت و لایەنەیل پەیوەندار کرس چشتەیل گرمەوکردن دانین بکەن، و چەویان وە رەوشەیل مرۆییان بوود.
ریکارەیل حکومەتی
هەرلیوا، دەزگایل گشت شارەوانی و وەرگری شارستانی ئاز خوەیان ئەرا وازکردن ئەو ریەیلە خستنە کار ک لەوەر وەفروارین ئمساڵ بڕیانر، و وەڕێەوبەرایەتی گشتی شارەوانی لە پارێزگای سلێمانی رایگەیان تیمەیلە وەردەوامن لە پاکەوکردن جادە و ریەیل سەرەکی لە قەزا و ناحیەیلە.
وەڕێەوبەرایەتی گشتی شارەوانی سلێمانی لە بەیاننامەیگ رەسیە ئاژانس شەفەق نیوز وت: تیمەیل تایبەت وەردەوامن لە پاکەوکردن جادە و ریەیل سەرەکی و لاوردن وەفر لە قەزا و ناحیەیلە.
بەیاننامەگە وتیش: تیمەیلە وە هاوکاری بڕیگ لەکۆمپانیایلە وەردەوامن لە پاکەوکردن جادەیلە و لاوردن وەفر کەڵەکەبۊی لە قەزای پێنجوێن و ناحیەی گەرمگ و ئاوایەیلی، وەگەرد لاوردن وەفرەگە لە ناحیەی سورداش و.ری گشتی ناوبەین شار سلێمانی و ناوچەی میرگەپان.
هوشداری و ری بەسیان
وەڕیەوبەرایەتی هاتوچوو پارێزگای سلێمانی هوشداری هاووڵاتییەیل کرد لە رۊکردن وەرەو ناوچە کۊەیلەز و دووپات کرد ک رانستن لە بان کۊیەیلە شایەت ژیانیان بخەیدە وەر رخبردن، و هەمیش داوا کرد شەوانە و شەوەکیان زۊی ماشین نەزانن و رۊی وەرەو ناوچە کۊیەیلە نەکەن وەخاتر سەڵامەتییان.
وەڕێەوبەرایەتیەگە چەن رییگ سەرەکی بەسا، جۊر ری دەباشان – تونێل پشدەر، و ری سلێمانی - دەربەندیخان، و ری پێنجوێن و ری سلێمانی - قەیوان ز و ری سلێمانی - میرگەپان، و ری تاسلوجە - بازیان، و ری دوکان – تاسلوجە.
و داوا لە رانندە و هاووڵاتییەل کرد وەخاتر سەڵامەتییان رۊی وەرەو ئەو ریەیلە نەکەن مەگەر ئەرا کاریگ فرە گرنگ.
