سلێمانی چەوەرێ 100 هەزار گەشتیار کەێد
شەفەق نیوز/ وەریەوبەرایەتی گشتی گەشتوگوزار سلێمانی، ئمڕوو جومعە، پیشبینی هاتن زیاتر لە 100 هەزار گەشتیار ئەرا پارێزگاگە کەێد، لەوەختیگ لە شەش مانگ یەکەم ئمساڵ زیاتر لە سێ ملیۆن گەشتیار سەردان هەرێم کردنە.
وەگورەی ئامار گەشتوگوزاری حکومەت هەرێم کوردستان، وە تەنیا لە شەش مانگ یەکەم ئمساڵ 3 ملیۆن و 112 هەزار و 500 گەشتیار سەردان هەرێم کردنە.
وەریەبەرایەتیەگە لە بەیاننامیگ رەسیە ئاژانس شەفەق نیوز دووپاتکرد، گشت رێکارەیل پێویست پیشوازیکردن لە گەشتیاریەیل ئەنجامدریایە، وەتایبەت ک پشوو جەژن هاووەختە وەگەرد پشوو مەکتەوەیل لە عراق، یەیش رێژەی گەشتیارەیل زیادەو کەێد.
دەسەی گشتی گەشتووگوزار هەرێم کوردستان، مەزەنە کەێد رەسێدە زیاتر لە 6 ملیۆن گەشتیار لەماوەی ساڵ 2022 ک 80% یان لە شارەیل ناوڕاس و باشوور عراق تیەن.
وتیش، لیژنەگە لە دەسەی گشتی گەشتوگوزار و وەریەوبەرایەتی گشتی پارێزگایەیل دروس بویە ئەرا وەرگردن سکاڵای هاوڵاتیەل لەباوەت نرخەیل، لە ری پەیوەندی کردن وەپیان، دیاری کردیش؛ سزای ئەو کەسەیلە دریەێد ک پابەند نەون.
