وەیجویرە سلێمانی ماڵاوایی لە ساڵ ٢٠٢٢ کرد
ئاهەنگ گورانی و مۆسیقا
گشت رووژیگ لە ساعەت هەفت ئیوارە تا وەخت دیریگ لە شەو، بڕیگ لە هونەرمەنەیل کورد لە جادەی سالم لەناو کەرنەڤاڵ ساڵ نوو بەشداری کەن، وەگورەی قسەی کاروان حسێن، ک هاووڵاتییگە خەڵک هەولێر هاتیە تا شەویگ لە شەوەیل سەر ساڵ لە سلێمانی بوێدە سەر.
حسێن ئەرا ئاژانس شەفەق نیوز ئویشێد: ئاهەنگیل گورانی کەشوهەوایگ ڕۆمانتیک دروس کەێد ک وەگەرد کەشوهەوای زمسان تیکڵا بوود، و گشتی وەگەرد ئاواز و وشەیل گورانی کوردی وەگەرد نەختینەیگ لە هونەرمەنەیل تیکەڵ بوود.
هەمیش ئویشێد: شمارەیگ لە هونەرمەنەیل کورد بەشداری لە ئاهەنگ ئەو کەن، و خەڵکەگە گردەو بوون، و بڕیگیان وشەیل گورانیەیل وەگەردیان ئویشن، و بڕیگیش ئومید تایبەت خوەیان وەگەرد کۆتایی ساڵەگە دیرن.
کاروان هەمیش ئویشێد: هەرلە خانمە هونەرمەن چۆپی فەتاح و هونەرمەن رۆژ کەریم و هونەرمەن ڤاڵان و هونەرمەن ساسان و هەنەرمەنەیلیگتر لە ئاهەنگ گورانیەگە بەشداری کردن.
چالاکیەیل پەهلەوانی گەشتیارەیل کیشێد
چالاکیەیلیگ ک شایەت تەنیا خوەشهاڵ مناڵەیل نەکەن، وەگورەی ئەوەک بەشیگ لە مەردم مەزەنە کەن، باوجی گەورەیلیش کیشن، ک وەگورەی قسەی "ياسر" ک لە بەغداد پایتەخت هاتگە، نووڕێدە ئەو چالاکیەیل هەکاتی شەوەیل سەر ساڵ جارانی لە سلێمانی نەوینە، بەڵکم زیاتر هاناوی، ک بلیاچۆ چەن جویلەیگ دڵخوەشکەر کەێد ک جویراجویر تەمەنەیل خوەشهاڵەو کەێد.
یاسر لە قسەیلی ئەرا ئاژانس شەفەق نیوز ئویشێد: هەمیش پەهلەوانیگ چەن جویلەیگ سەرنجی کەێد، و فرەیان مەردم فرەیگ وەخوەیان کیشن.
یاسر هەمیش ئویشێد: توەنێ ئیجویر جویلەیگ پەهلەوانی لە سێرک بوینێ، وەلێ لە خود وەختەگە، لە جادەی سالم لەناو شمارەی فرەیگ لە خەڵکەگە تەماشای کەێ.
پاپا نۆێل و شەوەیل سەر ساڵ
لە دویادویای ساڵ گوزەشتە و سەرەتای ساڵ نوو، کەسایەتی سانتا کرووز یا پاپا نۆێل دیار دەن ک پەیوەندی وە کریسمەس و جەژنەیل زایینی دیرن، تا دیاری ئەرا مناڵەیل بەشەو بکەن، لینا ئەحمەد ئەرا ئاژانس شەفەق نیوز ئویشێد: کەسایەتی پاپا نۆێل لە سەر ساڵ لەناو هویرمان مناڵەیل گریە بەساگە، لە مەوقەی پووشین ئی پڕتاڵ رەنگینە ک هویرمان مناڵەیل بەێدە ئەو چیرۆکەیل خەیاڵییە ک پەیوەندی وە عەرەوانە و دیاری دیرێد.
لینا خان هەمیش ئویشێد: پیرووزبایی لە ئەوەانە کەم ک سەرپەرشتیاری ئی کەرنەڤاڵە کردنە، کەسایەتی پاپا نۆێڵ هاوردن و نووڕیمن چەنیگ مناڵەیل دەیان وەپی خوەش بوی، و چوین هەسیان وەو کەسایەتیە گریە بەساگە ک مناڵەیل لە شیوەی ئەو پیرەمەردە وە دڵنگ سووری و ریش چەرمگی دیار دەێد.
چالاکیەیلیگ تایبەت وە مناڵ
وینەکیشان لەبان دەمچەو مناڵەیل لە سەر ساڵ لە جادەی سالم، ویستگەیگ گرنگە ئەرا گشت مناڵەیل، ک داڵگ مەریەم لە پارێزگای واست هاتگە، ئەرا ئاژانس شەفەق نیوز ئویشێد: زاڕووەیل خوەشییان لە وینەکیشان لەبان دەمچەو لە ئاهەنگ و جەژنەیل تیەێد، و هەمیشە خوەشیان تیەێد وینەی ئاژەڵ جویر پشی و شییر و سەگ بکیشن، یا پەروانە یا کەسایەتی کارتۆنی جویر سوپەرمان و سپایدەرمان یا حوری دەریا، یا رەنگەیل ئاڵا.
مارکیت شەوانەی گەورەیگ
ئاهەنگ سەر ساڵ لە پارێزگای سلێمانی تەنیا وە گورانی و چالاکییەیل مناڵ نەوی، وەلێ بازاڕیگ گەورە واز کریا، وەگورەی قسەی هاوژین خان ک یەکیگە لە بەشدارەیل ئەو بازاڕە.
هاوژین خان ئەرا ئاژانس شەفەق نیوز ئویشێد: نزیکەی ٨٠ کاسپکار لە ژن و پیاو لەی بازاڕە بەشداری کەن، ک کاڵا و چشتەیل فرەیگ لەناو ئی بازاڕە هەس، تایبەت ئەو چشتەیلە ک پەیوەندی وە جەژن زایینی دیرن، و دیاری کرد ک ئی بازاڕە لە ساعەت چوار ئیوارە تا ساعەت یانزەی شەو وازە.
