هەولێر دەس کەێدە دابەشکردن واکسین کۆڕۆنا

هەولێر دەس کەێدە دابەشکردن واکسین کۆڕۆنا
2021-03-04T08:48:06+00:00

شەفەق نیوز/ وەڕێۆبەرایەتی تەندروسی پارێزگای هەولێر پایتەخت هەرێم کوردستان، ئمڕوو پەنجشەممە، دەسکردە هەڵمەت دابەشکردن واکسین دژوە ڤایڕۆس کۆڕۆنا.

دکتۆر سەرهەنگ جمبار وەرپرس هەڵمەتەگە لە کۆنگرەیگ رۆژنامەوانی هاوبەش وەگەرد دکتۆر دلوڤان جەلال وەڕێۆبەر تەندروسی هەولێر و پەیامنێر ئاژانس شەفەق نیوز ئامادەی بوی وت: ئەیە رووژیگ مێژوویە ک دەسکیریەێدە لەناوبردن ئی ڤایڕۆسە، وتیش: ئمڕوو وە کاردە پزشکیەکان لە ژمارەیگ لە خەسەخانەیل هەولێر دەسوەپی کریەێد، ئەرا ئەوانەگ وەڕاستەخۆ وەگەرد بیماری کۆڤید-١٩ رەفتار کەن.

وتیش؛ دویای وەرگردن تاقەبەشەکان لەلایەن ئەیان، وەگورەی ئەو پلانە ک وەزارەت تەندروسی داناسەی، دەس کریەێدە تەمەن ٧٠ ساڵان وەبان، ئیجا ٦٠ ساڵان و خاوەن بیماریە دریژ ماوەیبەکان، و ئیجا هێزە ئەمنیەکان.

وەگورەی وەرپرس هەڵمەتەگە؛ هەولێر سێ ناوەند تەرخانکریاگ ئەرا دابەشکردن تاقەبەشەکان دیرێد، و وتیش؛ لە هەفتەی ئایندە ماڵپەڕیگ ئەلیکتڕۆنی ئەرا ئەوانە واز کەیمن ک خوازن واکسینەگە وەربگرن تا ناو خوەیان تۆمار بکەن.

هەمیش وت: بیجگە واکسینەگە، بایەدە هاووڵاتییەکان پابەند وە ریکارە مقەیەتیەکان بوون، چوونکە تەنیا رییگە ئەرا نواگردن تووشهاتن وە ڤایڕۆسەگە.

جمبار وتیش؛ ئەو بڕە ک لە واکسینەگە هاتکە، بڕ کەمیگە، و توانا دیریمن رووژیگ تاقەبەش بیەێمنە ١٠٠ کەس لە یەک ناوەند پزشکی، وەلی ئەگەر واکسینەگە وە بڕەیل گەورایگ دابین کریا توێنیمن ژمارەیگ گەوراتر لە گشت ناوەندەکان تاقەبەش بکەیمن.

لەلای خوەییش دکتۆر دلۆڤان جەلال لە کۆنگرەگە وت: بڕیارە بڕەیلیگ تر لە واکسین ئەسترازینیکا لە ماوەی دە رووژ ئایندە بڕەسێد، و هەر چەنی بڕەکان فرەتر بوین، ئەو مەوقە توێنیمن تاقەبەشەگە ئەرا فرەترین ژمارە دابەش بکەیمن.

و دووپات کرد ک تا ئیسە کاریگەریەکان وە بنچینە نووەگە هەر خود کاریگەریەیل بنچینە کۆنەگەس، وەلی هەمیش چەودیری خوازن، وکرفتەگە لە بنچینە نووەکان ئەوەسا ک وەزوی بڵاو بوود.

جی باسە ک گۆران عەزیز یەکەم کەسە لە کادرە پزشکیەکان ک لە هەرێم کوردستان واکسینەگە وەرگرد.

Shafaq Live
Shafaq Live