هەڵمەتیگ مرۆیی لە هەولێر ئەرا دەسمیەتی زەرەدمەنەیل لە گورزەیل ئیران
شەفەق نیوز/ بڕیگ لە چالاکوانەیل شارستانی لە هەولێر پایتەخت هەرێم کوردستان، ئمڕوو یەکشەممە، هەڵمەتیگ خوەیوەخشی ئەرا پیشکەشکردن دەسمیەتی مرۆیی ئەرا خانەوادەی زەرەدمەن لە گورزەیل ئیران لەبان ناوچەیل سنووری ڕێک خستن.
چالاکوان سێروان گەزنەیی لە کۆنگرەیگ رووژنامەوانی ئاژانس شەفەق نیوز ئامادەی بوی وت: هەڵمەتەگە سێ رووژ وەردەوام بوی، ک ئەوەسا دەسمیەتیەیل مرۆیی ئەرا خانەوادەیل زەرەدمەن لە قەزای کۆیە لە پارێزگای هەولێر گردەو کریەێد.
دیاری کرد ک هەڵمەتەگە وە هەماهەنگی وەرد دەسەڵاتەیل پارێزگای هەولێر و حکومەت کوردستان کریەێد، و ئەوەسا ئی هاوکاریەیلە دریەنە خیزانەیل زەرەدمەن وەڕی دەسەیگ پەنج کەسی لە چالاکوانەیل شارستانی.
لەلای خوەییش، خانمە چالاکوان مەدەنی سلڤانا دڵشاد ئەرا ئاژانس شەفەق نیوز وت: هەڵمەتەگە وەپلەی سەرەکی پشت وە گردەوکردن گشت هاووکارییگ خوازیاگ ئەرا مناڵ وژن بەسێد، ک ئەوەسا ٦٥٠ خیزان ئاوارە لە قەزای کۆیە گردێدەو.
دەزگای دژەتیرۆر لە هەرێم کوردستان، رووژ چوارشەممە، خەوەردا ک سوپای پاسدران ئیران پەلاماریگ مووشەکی لەبان هەرێم کوردستان وە چوار قۆناغ جیوەجی کرد، ک بویە هووکار کەفتن ١٣ شەهید و ٤٨ زەخمدار.
