هەرێم کوردستان سنووریگ ئەرا قەیران سوتەمەنی دانەێد
شەفەق نیوز/ کەمال محەمەد جینشین وەزیر سامانەیل سرووشتی لە حکومەت هەرێم کوردستان، ئمڕوو شەممە، راگەیان بەشەوکردن سێ مەلیۆن لیتر بەنزین وە نرخ حکومەت وە ماوەی هەر هەفتەیگ ئەرا بەنزینخانەیل هەولێر و سلێمانی و دهۆک.
محمد لە بەیاننامیگ رەسیە ئاژانس شەفەق نیوز وت: لە یەک ئی مانگ حوزەیرانە، داوا لە ئەنجومەن وەزیرەیل کردم، باجەیل گومرگی ک رەسێدە ٤٥ دۆلار لەبان هەر بەرمیلیگ بەنزین ئەرا بەرژەوەنی گەل لاوریەێد، و نرخ یەک لیتر بەنزین ئەرا ٨٠٠ دینار داوەزێد، دویای ئەوە ک رەسیە نزیکەی ١٤٠٠ دینار.
وتیش: لەوەر گرانی نرخەیل وکاریگەریی لەبان ژیان هاووڵاتی، بڕیار دریا باج لە بان بەنزین نەمینێد جویر یەکەم گامیگ ئەرا پاڵپشتیکردن بەرهەمەگە لەلایەن حکومەت، ودویای ئەوەیش دوو مەلیۆن لیتر دابین کریا تا لە هەولێر و دهۆک بەشەو بکریەێد، و وەگەرد کۆمپانیایگ رێککفتن بوی ئەرا دابینکردن ٢ تا ٣ مەلیۆن لیتر بەنزین ئەرا سلێمانی.
وەزیر مەزەنە کرد هەر هەفتەیگ سێ مەلیۆن لیتر بەنزین بخریەێدە بازاڕ، ودیاری کرد ک بەشەوکردن بەنزین وەنرخ حکومەتی لەلاین حکومەت فیدراڵی وە نرخ ٦٩٠ دینار ئەوەیش هەر مینێد.
محمد وتیش: ئەو بەنزینە ک ئیسە وە ٨٠٠ دینار فرووشیەێد، لەبان حکومەت هەرێم رەسێدە ١٢٠٠ دینار، باوجی وە پاڵپشتیکردنی وە ٨٠٠ دینار فرووشیەێد.
