گرانی بانزین کرای ماشینەیل جادەیل سلێمانی گران کەێد
شەفەق نیوز/ بەرزەوبوین نرخ بانزین رەوش رانندەیل ماشینەیل ئاڵشت کرد ک فرەیان ناچار بوین کراگە لە ٥٠٠ ئەرا ١٠٠٠ دینار گرانترەو بکەن.
خاوەن بانزینخانەیلە و بەشیگ لە ئەندامەیل ئەنجومەن پارێزگاگە باسیگ لە گرانی بانزینەگە نەکردن، و خوەیان نەخستنە وەر قسەکردن، باوکی عومەر کولبی ئەندام پەرلەمان کوردستان ئەرا ئاژانس شەفەق نیوز وت: حکومەتەگە خوەی یەکەمین وەرپرسە لە بەرزەوبوین نرخ بانزین، و بایەتە گامەیل زوییگ بنەێد ئەرا پاڵپشتی نرخەیل بانزین ئەرا خەڵکەگە، و بانزینەگە ئەرا تەنیا دوو کۆمپانیا لە هەرێم گیر نارێد، و بەرنامەی راسییگ ئەرا نواگردن گرانی سوتەمەنی دانەێد تا کۆمپانیایلە بەد وەکاری نارن.
کەماڵ جەبار یەکیگە لە رانندەیل ماشینەیل کرا لە شار سلێمانی ئەرا ئاژانس شەفەق نیوز وت: نرخ بانزین لە بانزینخانەیلە وەشیوەیگ رووژانە گرانەو بوود وەبی هیچ چەودیریکردنیگ یا هەڵوێستیک لەلایەن حکومەت، ک ناچارمان کرد نرخ گواستنەوە بەرزەو بکەیمن هەرچەن سوارەیلە کەمن و ماشینەیلە فرەن، و نێزانیمن کەی ئی کارە چارەسەر کریەێد، گشتی خوەی لە وەرپرسایەتی خەێدە کنار، و ئێمە و هاووڵاتییەیلە باجەگەی دەیمن.
سالار حەمە سەعید، ئەویش رانندەیگە وە چەوەڕی سواریگ لە جادەیل سلێمانی وسیاگە، دیاری کرد ک فرەی تەکسیەیلە جویلە نێکەن تا بانزینیان وەبیخود تەواو نەوود، لەێرا چەوەڕی ریواریگ کەیمن شایەت وەگەردمان سوار بوود.
سەعید هەمیش ئەرا ئاژانس شەفەق نیوز وت: ئەو رانندەیلە ک کراگە گران کردنە کوناهنبار نیین، ک هەر رووژیگ بانزین گرانترەو بوود و هیچ ئومیدیگ وە داوەزین نرخەگەی نەیریمن، و حکومەتەگەیش نووڕێدە پیمان.
