هەرێم کوردستان راگەینێد پابەندیی وە جیوەجیکردن یاسای قەرزکردن
شەفەق نیوز/ شاند حکومەت هەرێم کوردستان لە بەغداد پایتەخت، ئمڕوو سێشەممە، راگەیان رەزامەنیی لە پایەندی وە جیوەجیکردن بەندەگان لە یاسای پەەککەفتن دارایی ک تایبەتە وە هەرێم کوردستان، لە دویای دانووستانەیلیگ وەگەرد حکومەت فیدڕاڵی.
ئاوات شێخ جەناب وەرپرس شاندەگە وەزیر دارایی هەرێم کوردستان لە کۆنگرەیگ رۆژنامەوانی ئمڕوو وەگەرد ئەندامەیل شاندەگە وت: پەیامیگ لە وەزارەت دارایی فیدڕاڵی وەرگردیمن وە پابەندی وە جیوەجیکردن بەندەیل یاسای پەککەفتن دارایی، و حکومەت هەرێم وەڵام رەزامەنیی وەگشت یاساگە دا.
وتیش: لە سەردانەگەمان ئەرا بەغداد تا ئیسە خەوەردار بەغداد کردیمنە وە ئامادەیی هەرێم کوردستان لە جیوەجیکردن بنەمایل دەستور، و گشت یاساگان پەرلەمان عراق.
وەزیرەگە وتیش: راگەینیمن ک تۆپەکە ئیسە هالە یاریگای حکومەت فیدڕاڵی، و پەرلەمانتارە کوردەگان، و پەرلەمان عراق ئەرا جیوەجیکردن بڕیارەیل یاسای قەرزکردن دارایی دویای ئەوە ک هەرێم کوردستان پابەندی خوەی وە یاساگە نشاندا.
لەلای خوەییش خالد شوانی ئەندام شاندەگە وەزیر باوەتەیل هەرێم لە کۆنگرەگە وت؛ حکومەت هەرێم وەشیوەیگ فەرمی خەوردار حکومەت فیدڕاڵی کرد ک هیچ ریگریبگ نەیرێد لە رەفتارکردن وەگەرد یاسای قەرزکردن، و ئاماژە کرد ک بەغداد داوا لە هەولێر کرد دەس بکەێدە جیوەجیکردن ریکارەگان ئەرا جیوەجیکردن یاساگە، و حکومەت هەرێم فەرمان داگە لایەنە پەیوەندیدارەگان ئەرا جیوەجیکردن یاساگە.
وتیش؛ داوا لە حکومەت فیدڕاڵی کردیمن کۆبونەوەیگ هونەری هاوبەش ئەرا ئەو لایەنەیلە بکریەێد ک پەیوەندیدارن وە جیوەجیکردن یاساگە، و داوای دابینکردن شایستە داراییەگان هەرێم کوردستان لە بەشەگەی لە بوودجەی گشتی لە حکومەت فیدڕاڵی کەیمن ک لە یاسای قەرزکردنەگە دیاری کریاگە.
هەمیش وت: وەیجوورە هیچ دەسپیچگیگ یاسایی یا سیاسی نییە ریگری لە خەرج شایستە داراییەگان هەرێم کوردستان بکەێد ک ویاسا چەسپیاگە.
