نرخ کووپیگ «نسکافێە» لەناویان رەسیە زیاتر لە ١٥ دۆلار.. بەسانن کافیتریایلیگ لە هەولێر
شەفەق نیوز/ نەبەز عەبدولحەمید قایمقام پارێزگای هەولێر پایتەخت هەرێم کوردستان، ئمڕوو چوارشەممە، راگەیان بەسانن ژمارەیگ لە کافیتریاگان لەوەر بەرزەوکردن نرخ خواردن ونووشینەیلیان ک ئەرا کریایەگانیان پێشکەش کەن.
عەبدولحەمید لە بەیاننامەیگ وت: باوەت نرخەگان لە ناونی چێشختنەگان جیوازن، و لە ئاست جهانیش وەیجوورەس، و هەمیشە نرخ خواردن لە چێشتخانە جەماوەریەگان لەواکان ئەرزانترە، وتیش؛ لە چەن شوونیگ بەد وەکارهاوردن هەس، ک بیزاری لەلای مەردمەگە پەیا کردگە، و ئیمە کەفتیمنە چەودیریکردن ئەو باوەتە.
دەربارەی بەسانن ژمارەیگ لە کافیتریاگان، قایمقام وت: نرخەگان لە ئاست خوەیان دەرچگن، و فرە گرانەو بوین، و یەکیگ لەو شوونەیلە نرخ یەک کووپ نسکافێە رەسانە ١٥-١٦ دۆلار، و ئیمە وەرجەیە هووشدارییان کردیمنە.
ئەیەیش لەوەختیگ تیەێد ک مەردمەگە و وەتایبەت گەنجەگان لە شار هەولێر داد لە دەس بەرزەوبوین نرخ خواردن ونووشینەگان لە بەشیگ لە قاوەخانە و کافیتریاگان کردن، و بەشیگیان هووکار ئەوە خستنە بان وەدویاچگن چەودیری لەبانیان.
