نێچیروان بارزانی و پزیشکیان دووپات کەن: وتووێژ و لەیەکفامستن خاسترین ریە ئەرا وەدیهاوردن سەقامگیری

شەفەق نیوز - ئانتاڵیا

سەرۆک هەرێم کوردستان نێچیروان بارزانی،  ئمڕوو پەنجشەممە، گردەوبوینیگ ک وە "بەرهەمدار" وەسفی کرد وەگەرد سەرۆک ئیران مەسعوود پزیشکیان ئەنجامدا، ئەوەیش لە پەراوێز کۆڕبەن دیپلۆماسی لە شار ئانتاڵیا.

سەرۆک نێچیروان بارزانی لە بڵاوکریایگ خوەی لەبان پلاتفۆرم "ئێکس" دیاری کرد، ئاڵشتکردن هویروڕا لەباوەت پەیوەنییەیل دووقۆڵی کردگە کە هەرێم کوردستان و عراق و ئیران گردەو کەێد.

هەمیش دیاری کرد، خوەی و سەرۆک ئیران دووپات لە گرنگی وەردەوامبوین هەماهەنگی و تەقەلایل بەشدار کردن ئەرا رویوەرویبوین ئاستەنگەیل ناوچەیی، و دووپات کردن کە ووتووێژ و لەیەکفامستن و دەسمیەتی خاسترین ریە ئەرا وەدیهاوردن ئاشتی و سەقامگیری هەمیشەیی لە ناوچەگە.