نێچیروان بارزانی پشتگیریکردن خوەی ئەرا ئازادی رووژنامەوانی نووەو کەێد
ئەوەیش لەناو پەیامیگ وەلایەن بارزانی لە ١٢٥مین ساڵیاد رووژنامەوانی کورد، و ٢٥مین ساڵیاد دامەزریان سەندیکای رووژنامەنویسەیل کوردستان.
بارزانی لەناو ئەو پەیامە ک رەسیە ئاژانس شەفەق نیوز وت: پیرووزبایی لە گشت رووژنامەنویسەیل کورد کەم وە ١٢٥مین ساڵیاد رووژنامەوانی کورد و ٢٥مین ساڵیاد دامەزریان یەکێتی رووژنامەنویسەیل کوردستان، و ئومید سەرکەفتن ئەرایان خوازم، و سڵاو لە گیان موقداد مەدحەت بەدرخان دێرین ک یەکەمین رووژنامەی (کوردستان) دەرکرد.
بارزانی وتیش: وەی بوونە، پشتگیریکردن تەواوم ئەرا رووژنامەنویسەیل، و ئازادی رووژنامەوانی، و ئازادی قسەکردن، و ئازادی قەڵەم، و ئازادی نویسین، نووەو کەم، ک بنەڕەت سەرەکیە ئەرا هەر کۆمەڵگایگ زنی و گەشکەر، و دووپات کرد ک یە گرنگە ئەرا قایمکردن دیموکراتی و ئازادی، و مقیەتیکردن ماف مرۆڤ، ئەراوە مقیەتیکردنی ئەرکە.
بارزانی جەخت کرد ک "وشە وەرپرسایەتیە"، و داوا لە رووژنامەنویسەیل کوردستان کرد وە بەرزترین ئاست ئەمانەت و وەرپرسایەتی وەگەرد وشە رەفتار بکەن، و خەوەر و رویداوەیل وە ئازادی و پیشەیی و راسگوی بڵاو بڕەسنن، و ئەرکیان وە شیوەی راسیگ لە چوارچیوەی رەوشتەیل رووژنامەوانی جیوەجی بکەن، تا بتوەنن دەور راس خوەیان بڕانن لە دیاریکردن هەڵە و لەکەیل و راسەوکردنیان.
بارزانی لە کۆتایی پەیامەگەی وت: سڵاو لە گشت ئەو رووژنامەنویسەیلە ک گیان خوەیان کردنە قوربانی لە سەردەم خەبات و ئازادی و یادیان تا هەمیشە هەر مینێد.
ئمڕوو شەممە، ٢٢ نیسان ٢٠٢٢، هەرێم کوردستان ساڵیاد رووژ رووژنامەوانی کەێد، ک لە رووژەیگ جویر ئمڕوو، یەکەمین شمارە لە رووژنامەی "کوردستان" دەرچگ، و سەندیکای رووژنامەنویسەیل هەرێم کوردستان دامەزریا.
