نێچیروان بارزانی داواکردنی لە حکومەتەگە ئەرا قەرەبووکردن قوربانیەیل بەهدینان نووەو کەێد
شەفەق نیوز/ نێچیروان بارزانی سەرۆک هەرێم کوردستان، ئمڕوو چوارشەممە، بەیاننامەیگ وەبۆنی ٣٣ ەمین ساڵیاد ئەنفالکردن ناوچەی بەهدینان دەرکرد، و لە خود وەختەگە داوا لە حکومەت عراقی کرد کەسوکارەیل قوربانیەیل ئی کوشتارە ک رژیم سەدام حسێن لە دویادویای هەشتاکان ئەنجامی دا قەرەبوو بکریەن.
سەرۆک بارزانی لە بەیاننامەیگ رەسیە ئاژانس شەفەق نیوز وت: ئمڕوو لە سی و سێیەم ساڵیاد ئەنفالکردن بەهدینان، وە رێز و نەوازش یاد ئەو شەهیدەیلە کەیمن ک لەو ئۆپراسیۆنەیلە کەفتن ک هەر لە ٢٥ ئاب تا ٦ ئەیلوول لە ساڵ ١٩٨٨ وەردەوام بوی، ئەوەیش لەناو دویاترین قۆناغ ئۆپراسیۆنەیل ئەنفال، ک پەنج فیرقەی سەربازی عراقی لەبان خەڵکە مەدەنیەگەی ناوچەی بەهدینان جیوەجیی کردن.
وتیش؛ لە وەردەوامی ئەو هەڵمەتە، تاوانبارەیلە وەگشت وەحشیەتیگ ولە تاوان بی هاوشیوەیگ ١٨٢ هەزار هاووڵاتی کوردستانی لە گەرمیان وەرەو دویاترین ئاوایەیل بەهدینان وەرەو بیاوانەیل مەرگ لە باشوور عراق بردن، و هەکاتی کردەوەیان لە بەهدینان هیچ جیوازییگ لەناوبەین مزگەفت یا دێر یا ماڵ یا باخ و بوسانیگ نەکردن، ک سرووشت و ژینگەی کوردستان سزانن و رمانن.
سەرۆک هەرێم نشان دا ک ئەنفالکردن بەهدینان و گشت ئەو تاوانەیلەگ لەبان گەل کوردستان جیوەجی کریان، هەر جوور زەخمیگ مینن ک قەت تیمار نێەوون، و قەت لە یاد نێچوود، و جوور سومبلیگ بوودە بەڵگەی ستەمدیدەی گەل ئاشتەوایی دووسیگ تەنیا داوای ژیان و ئازادی و مافەیلی کردگە، ئی ساڵیادە و ئەو میژوو پڕ نەهامەتی و زیانەیل گەل کوردستانە، رکداری ئی گەلە زیایەو کەن، ک هەمیشە تەقەلا دەێد بڕەسێدە خەو و خوازین خوەی.
نێچیروان بارزانی وتیش؛ ساڵیاد شەهیدەیل ورەنج گەل کوردستان و قوربانیەیلە هانمان ئەرا وەپشتسەرنان سەختیەیل ئیسە و بتەوکردن یەکڕزی و یەکگردن هاوبەشی ئەرا گشت پێکهاتەیل گەل کوردستان دەێد وەخاتر وەدەسهاوردن دویارووژیگ خاستر.
بارزانی هەمیش جەخت کرد ک لەی ساڵیادە دووپات کەیمن ک بایەتە حکومەت فیدڕاڵی عراق بڕیارەیل دادگای عراقی باڵا ئەرا تاوانەیل قەرەبوو کەسوکارەیل قوربانیەیلە بکەێد، و لە هەرێم کوردستان جەخت لەبان پێشکەشکردن خزمەتگوزاری زیاتر ئەرا کەسوکارەیل شەهید و ئەنافالکریایەیل کەیمن.
سەرۆک هەرێم کوردستان وتیش: بایەتە کار لەبان بەڵگەکردن تاوانەیلە بکەیمن تا وە جینۆساید لە ئاست ناودەوڵەتی بیریەێدە قەڵەم، و گشت رەنجەیلە وەخاتر بڕین ریەگە لەنوای دووارەکردن ئیجوور تاوانەیلیگ لە گشت شوینیگ لە روی زەوی گردەو بکەیمن، تا مرۆیی قەت ئیجوور تاوانەیلیگ وەخوەی نەوێنێد.
