نێچیروان بارزانی دەسنشان گیچەڵیگ "بنەڕەتی" وەرد بەغدا و گلەییگ ئەمریکی کەێد: ئیران وڵاتیگ هاوساس و ئیمە خاوەن ماڵیمن

بارزانی لە مەوقەی بەشداریکردن لە کۆڕبەند “میری” کە لە هەولێر وەڕیەو چگ، وت: “وە نووڕین من گیچەڵیگ بنەڕەتی لە پەیوەندی ناوەین هەولێر و بەغداد هەس، کە وەگورەی دەستوور عراق دەوڵەتیگ فیدراڵییە، بەڵام لە ناوی مەرکەزییەت هەس، و فیدرالیزمیش ریڕەوی خوەی نەگردیە، ئەگەر ئی گیچەڵە چارەسەر نەکریەێد، وەنە ئەو گیچەڵەیلیش چارەسەر نیەوون.

ئەگەر بخوازیمن سەقامگیری سیاسی و ئابوور لە عراق بیاشتویمن، بایەسە وە گشت شەفافیەتیگ تاوتوێی ئی باوەتە بکەیمن وەبی لایەنگری”.

وتیش: لەماوەی چەن مانگ گوزەشتە پیکهاوردن هاوپەیمان ئیدارەی دەوڵەت، پیشکەفتن داشت، و گیچەڵەیل ترەک هەس، بەڵام نەخشەڕی  ئەرا ئەو چارەسەرەیلە دیریمن.

هەمیش وت: “جویر پرەنسیپ نەبایەس عراق بوودە هەڕەشە لەبان هویچ وڵاتیگ، و دروسیش نییە هیزەیل ئۆپۆزسیۆن مەشق و راهێنانیان وەپیان بکریەێد،  و بچنە وڵاتەیل، ئەرکیان ئەنجام بیەن و گلەو بخوەن، بەغدا رێککەفتن وەرد ئیران کردیە، و هەرێم کوردستانیش پابەندە وەی ڕێککەفتنە، و دووپات کەیمن کە هەرێم هەڕەشەیگ لەبان ئیران نەیرێد، کە وڵاتیگ هاوساس، و قۆناغ خاسیگ رەد کردیمنە، ئیرانیش تا رادەیگ رازییە وەی گامە.”

بارزانی وتیش "ئیران وڵاتیگ هاوساس بەڵام ئیمە خاوەن ماڵەگەیمن".

لەباوەت وزە، نێچیروان بارزانی وت: دوو گیچەڵ لەوەردەم هەناردەکردن نەفت هەس یەکەمیان پویل کۆمپانیایلە و چوینیەتی خەرجکردن ئی پویلە، هەرلیوا فۆڕم ڕێککەفتنەگەمان وەرد کۆمپانیایل هاوبەشییە و خزمەتگوزاری نییە، گیچەڵ دویەم ئەوەس کە سۆمۆ بایەسە ڕێککەفتن وەرد ئەو کۆمپانیایلە بکەێد، وەگشتی کێشەگە لە بەغداس لە تورکیا نییە”، لە دەسنشان وە پرس وسانن هەناردەکردن نەفت ئەرا بەندەر جیهان تورکیا.

لەباوت پرس بویین پەکەکە لە هەرێم کوردستان، بارزانی وت: بایەسە کێشەی پارت کرێکاران وەشیوەی سیاسی چارەسەر بکریەێد و نەک لەڕوی سەربازییەو، پارتی کرێکاران گیچەڵیگ گەورەس ئەرا هەرێم کوردستان و هویچ ئەغمازیگ ئەرا دامودەزگایلمان نەیرێد، و نیەتوەنن گەرەنتی بیەن تورکیا دەسوەردان نیەکەێد ئەگەر پەکەکە لەبان خود سیاسەت خوەی بمینێد."

لەباوەت تەوەریگ تریش بارزانی وت؛ ئەگەر لە ساڵ 1991ەو بنووڕیمنە میژوو، ئەمریکا بەشیگ سەرەکی بوی لە پاراستن هەرێم کوردستان لەو سەردەمە، ئەگەر ئەمریکا و هاوپەیمانەیل لە وڵاتەیل ئەورووپا هاوکاری هەرێم نەکردیاد و عراقیش لە ساڵ 1991 لە جەنگ داعش نەکردیاد، وەنە نەزانستیمن چە بوود”.

هەمیش وت: ئاڵشتکاری گەورە لە سیاسەت ئەمریکا وەرانوەر ئیمە نیوەنیمن، زانیمن کە ئەمریکا کێشە دیرێد لە ڕێکخستنەوەی هیزەیل پیشمەرگە، ئی باوەتیشە دروسە، چوینکە گامەیل خاون، بەڵام نیەتوەنیمن بویشیمن کە تا ئیسە هویچیگ نەکردیمنە، بەڵام تا ئیسە نەڕەسیمنەسە ئەوەگ هاوپەیمانەیلمان خوازن، و نیەتوەنیمن مەوقەیگ دیاری بکەیمن ئەرا کۆتای هاتن ئی پرۆسە.