نێچیروان بارزانی: پارتی و یەکێتی رێککەفتن ستراتیژی نوویگ خوازن
شەفەق نیوز/ نێچیروان بارزانی سەرۆک هەرێم کوردستان، ئمڕوو دووشەممە، دووپات کرد ک پارتی و یەکێتی رێکخستن رێککەفتنیگ ستراتیژی ناوبەینیان خوازن.
بارزانی لە وتاریگ لەناو ئاهەنگ ماتەمینی وە ساڵیاد کووچکردن سەرۆک وەرین عراق جەلال تاڵەبانی لە هەولێر ک ئاژانس شەفەق نیوز چەودیریی کرد وت: ئیسە هەس وەو چووڵاییە کەیمن ک مام جەلال هیشتەی جی، ک میژووی بەشیگ گرنگە لە میژوو بزووتنەوەی ئازادیخواز کورد.
وتیش: مام جەلال ئەرا من ساڵیادیگ گرنگە ئەرا ئاشتی وکار هاوکاری، ک یەکەیمن جار لە ٨ تەشرین دویەم ١٩٨٦ چەوم کەفتەلی، وەگەرد باوگم (ئیدریس بارزانی) بویم لە رێککەفتن ئاشتی ناوبەین پارت دیموکراتی کوردستان و یەکێتی نیشتمانی کوردستان.
وتیش: ئی رێککەفتن ئاشتیە ناوبەین مام جەلال وباوگم هیشت بوودە ئاشتەوایی گشتی لە کوردستان.
وتیش: مام جەلال وسەرۆک مەسعود بارزانی هەمیشە یەکەو گردن لە بڕیارەیل و پیشکەفتن وگەشەکردن هەرێم کوردستان، ئەوەیش لەدویای یەکڕزی هیزەیل سیاسی.
نێچیروان بارزانی وتیش: ئمڕوو هەرلە پارت دیموکراتی کوردستان و یەکێتی نیشتمانی کوردستان، رێککەفتن ستراتیژی نوویگ خوازن وەگورەی ئی قۆناغ ئیسە، ک دویای ئەو رێککەفتن ستراتیژیە ک لەناوبەین هەردوگ حزبەگە بوی، سیمایل دووچەوەکی لە ئیدارە لە هەرێم کوردستان کەمەو بوین، و پایەیل حکومەت هەرێم کوردستان چەسپیان، و دادپەروەری بڵاو بوی.
