نێچیروان بارزانی: پابەندین وە ڕێککەفتن وەرد ئیران و هویچ دەسپیچگیگ ئەرا دەسکردن وە ئۆپەراسیۆن سەربازی نییە
2023-09-13T09:48:15+00:00
شەفەق نیوز/ نێچیروان بارزانی، سەرۆک هەرێم کوردستان، ئەمڕوو چوارشەممە، پابەندبوین هەرێم وە ڕێککەفتنە ئەمنییەگەی ناوەین بەغدا و تەهران دووپات کرد، کە مەرج چەکماڵین گروپ و لایەنە کوردییەیل دژبەر ئیران و ئامادەیی لەناو خاک هەرێم دیاری کردگە، نووڕین خوەی نشان دا کە هویچ دەسپیچگیگ نییە ئەرا دەسکردن وە ئۆپەراسیۆن سەربازی لەبان ئەو گرووپەیلە.
قسەی سەرۆک هەرێم لە پەراویز گردەوبوینی وەرد ئەلێکساندەر چاڵنبێرگ وەزیر دەیشت نەمسا هات، کە وە سەردانیگ ئەرا شار هەولێر پایتەخت هەرێم کوردستان هاتیە.
نێچیروان بارزانی ئەرا رووژنامەنویسەیل وت: کە پەیامنێر ئاژانس شەفەق نیوز لەناویان بوی، ڕێککەفتنیگ هەس لەناوەین عراق و ئیران واژوو کریایە و ئویشێد؛ "ئیمە لە هەرێم کوردستان و جویر بەشیگ لە عراق پابەندیمن وەی ڕێککەفتنە، و نیەخوازیمن هەرێم بوودە سەرچەوەی هەڕەشە ئەرا هەر وڵاتیگ هاوسامان”.
وتیش؛ لە چوارچیوەی ئەوە و وە هاوکاری و هەماهەنگی تەواو وەگەرد بەغدا گامەیل گرنگ نریایە، هیواداریمن ئەو گامەیلە ریگری لە رویدان هەر گیچەڵیگ ئەمنی و سەربازی بکەێد.
نێچیروان بارزانی وتیش: وەڕای من هویچ دەسپیچگیگ نییە ئەرا دەسکردن وە ئۆپەراسیۆن سەربازی لەلایەن ئیرانەو لەبان ئەو لایەن و گرووپەیلە کە هانە ناو خاک هەرێم.
