نێچیروان بارزانی گاڵ ئەڵمانیا دەێد پشت عراق و هەرێم کوردستان بگرێد ئەرا نواگردن ئاڵشتبوین کەشوهەوا
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: بارزانی لە پەرلین پایتەخت ئەڵمانیا، وەگەرد فرانسیسکا براتنەر خانمە سکرتێر دەوڵەت لە وەزارەت ئابووری ئەڵمانیا گردەو بوی، وە ئامادەبوین باڵیۆز عراق، و هەردوگ لایەنەگە باس سەختیەیل لە روی عراق لەوەر ئاڵشتبوین کەشوهەوا و کەنداوی و هشکەساڵی وەبیاوانی.
دووپات کردن ک ئی ئاڵشتبوینە هیلێد عێلی پاڵپشتیکردن و دەسمیەتی و ئەزموون دەیشتەکی خوازێد.
هەردوگ لایەنەگە لەبان گرنگی بەرنامەی توکمەیگ ئەرا نواگردن ئی سەختیەیلە لە عراق رێک کەفتن، و زوور لە گرنگی دەسمیەتیداین عراق وەتایبەت لە چین وزەی نووەوبوی و کەمکردن پشتبەسان وە نەفت و هاندان کەرت تایبەت و بەرهەمهاوردن ئەڵمانی لە عراق و هەرێم کوردستان.
وەرجەیە، نێچیروان بارزانی سەرۆک هەرێم کوردستان، ئمڕوو، چەوی کەفتە سیڤینا شۆلتز خانمە وەزیر هاوکاری ئابووری و گەشەپیدان ئەڵمانی، و باس گەشەپیدان پەیوەندیەیل ناوبەین ئەڵمانیا و عراق و هەرێم کوردستان و هاوکاری هاوبەش لە جویراجویر چینەیل کردن، و هەمیش باس رەوشەیل لە شنگال و ئێزدیەیل و ئاوارەیل لە هەرێم کوردستان وەگەرد مەترسیەیل ئاڵشتبوین کەشوهەوا لەبان عراق کردن.
هەمیش چەوی کەفتە توبیاس لیندنز خانمە وەزیر دەوڵەت ئەڵمان ئەرا کاروبارەیل دەیشت، و داوا لە ئەڵمانیا کرد وەردەوام بوود لە پاڵپشتیکردن عراق و هەرێم کوردستان ئەرا لەناوداین تیرۆر و چەسپیان ئاسایش و ئارامی.
