ژنە ئاوارەیگ لە سلێمانی لە یوتیوب هووکارەی دویرمانن بوود تا دەسمیەت هاوسەرەگەی بەێد

شەفەق نیوز/ پارێزگای سلێمانی لە هەرێم کوردستان، پەنج کامپ ئاوارەیی هاناوی، هەژماریان رەسێدە ٢٥٠٠ خیزان، لەوانە ک هیمان توانای چگنەوە ئەرا ناوچەیل خوەیان نەیرن، لەوەر هەڕەشەیل تیرۆر و ئەو ویرانیە ک رەسیە مناڵەیلیان و خەمسەردی حکومەتەگە لە بردنەوەیان، و بەشیگ لەی ئاوارەیلە، و ژنەیل وەتایبەت، داهێنان کەن لە دروسکردن کارەیل

جووراجوریگ ئەرا دابینکردن ژیان و گوزەرانی خیزانەیلیان و دەسمیەتی پیاوەیلیان لە هەڵگردن قورسی و وەرپرسایەتی ژیانەگە.

دونیا فەلاح، یەکیگە لەوانەگ پڕۆژەی بویچگیگ واز کرد، ک خوەی دوکان دویرماننە لە کامپ (ئاشتی) لە ناحیەی عەرەبەت لە سلێمانی، لە قسەیلی ئەرا ئاژانس شەفەق نیوز وت: لە مەوقەی کۆچبردنم وەرجە شەش ساڵ گوزەیشتە لە ناوچەی یەسرب لە پارێزگای سەڵاحەدین وەرەو کامپ ئاشتی لە عەربەت، هویرەو کردم دەس دەسمیەتی بیەمە خیزانەگەم و پیاوەگەم

وەتایبەت، لەوەر کەمی دەرفەتەیل کار، وتیش؛ لە مناڵیەو فێرخوازیەگەم دویرمانن بوی، و لەڕی تەماشاکردن ڤیدیۆکان لەبان یوتیوب و دەسمیەتی ژنە هاوساگەم هووکارەی پیشەی دویرمانن بویم.

دونیا هەمیش ئووشێد؛ بەشیگ لە چادرەگەمان کردمە دوکان دویرمانن، و دیاری کرد ک رەوشەیل ناو کامپەگە سەختن، ک فرەی ئاوارەیل پویل ئەرا سەنین پارچە پەڕوو یا پویل دویرمانن نەیرن، ک ناچار بووم وە قیست بفرووشمە پییان تا بتوێەنم پویل وەدەس بارم.

دیاری کەێد؛ پیاوەیل

رووژانە کاری کەن، و ژن تەقەلا دەێد هەماهەنگییگ لەناوبەین ماڵ و دەرفەت کاریگ پەیا بکەێد تا دەسمیەتی هاوسەرەگەی بەێد، و ئاماژە کرد ک لەی ساڵەیل گوزەیشتە هاوکاریەیل حکومەتەگە و رێکخراوە مرۆییەکان کەمەو بوین.

تانیا کەماڵ وەڕێۆبەر رێکخراو (راسان) ئەرا وەرگریکردن لە مافەیل ژنەیل لە هەرێم کوردستان لە قسەیلی ئەرا ئاژانس شەفەق نیوز ئاماژە کەێد؛ ژنەیل ناو کامپەکان ژیان لە سەنگینی وەرپرسایەتیەگەی ماڵ و کار وەخوەیان دوینن.

کەماڵ دیاری کەێد ک فرەی ژنە ئاوارەکان ئەرا دەسمیەتی هاوسەرەیلیان لەوەر رەوشە سەختەکان لەناو کامپەیل لە کەمی دەرفەتەیل کار و دابینکردن خوازینە گرنگەکان دەسکەنە کارکردن، لە سای کەمی هاوکاریە مرۆییەکان ک لەلایەن حکومەت عراق دریەن، و وتیش؛ رێکخراوە ناودەڵەتی و ناوخۆییەکان زیان لە قەیرانەیلیگ دارایی وەخوەیان دوینن لەوەر کاریگەریەیل کۆڕۆنا، و هەمیش ئووشێد؛ رێکخراوەکانیش توانایان لە پێشکەشکردن هاوکاریەکان ئەرا ژنە ئاوارەکان نەمەن، چوونکە ئەوانیش کەم پشتگیری دارایی لەوەر پەتای کۆڕونا وەخوەیان دوینن.