مەسرور بارزانی و شاندیگ بەریتانی دووپات لە هەماهەنگی هاوبەش کەن
شەفەق نیوز/ مەسرور بارزانی سەرۆک حکومەت هەرێم کوردستان، ئمڕوو چوارشەممە، چەوی کەفتە شاندیگ بەریتانی گەورەیگ وە سەرپەرشتیاری سامی سامبسون گەورەی راوێژکارەیل وەزارەت وەرگری بەریتانی ئەرا باوەتەیل خوەرهەڵات ناوڕاس و باکوور ئەفریقیا.
لەو دیدارە ک ستیڤن هیکی باڵوێز بەریتانیا لەلای عراق ئامادەی بوی، باس دویاترین نووەوەبویەکان لە عراق و ناوچەگە کریا، و هەمیش باس ئاسۆەیل بتەوکردن پەیوەندیەیل ناوبەین بەریتانیا و هەرێم کوردستان، وەگورەی بەیاننامەی حکومەت هەرێم.
شاندە بەریتانیەگە دووپات لە پابەندی بەریتانیا و هاوپەیمان ناودەوڵەتی ئەرا پشتگیریکردن هێزەیل پێشمەرگە کرد ئەرا نواگردن هەڕەشەیل داعش، و هەمیش دووپات لە گرنگی گورجەوکردن هەماهەنگی ئەمنی لەناوبەین سوپای عراق و پێشمەرگە کرد، وەتایبەت لە ناوچەیل کوردستانی لە دەیشت ئیدارەی هەرێم کوردستان، ئەرا نواگردن هەر هەڕەشەیگ تیرۆری داعش.
شاندە میوانەگە لەناو کۆبونەوەگە دەسخوەشی لەو چاکسازییەیلە کرد ک حکومەت هەرێم کوردستان لەناو وەزارەت پێشمەرگە ئەنجامی دەێد.
