مەسرور بارزانی بەشداری کۆربەن دایەلۆگ مەنامە کەێد
شەفەق نیوز/ سەرۆک حکومەت هەرێم کوردستان مەسرور بارزانی وە گەرد شاندیگ حکومەتی، ئمروو جومعە، وەرەو مەنامە پایتەخت شانشین بەحرەین کەفتەڕێ ئەرا بەشداریکردن لە کۆڕبەن (دایەلۆگ مەنامە 2021) لە رووژەێل 19-21 ئی مانگە.
وە ئامادەبۊین بڕێگ لە سیاسەتکار و هۊیرمەن و خاوەنکار و کەسایەتيەێل ناسریاگ جەهانی وەرێوە چوود و گفتوگو لە بابەتەێل پەیوەنیدار وە ئاسایش و وەرگری و گرفتەێل ناوچەگە و جەهان کریەێد.
بڕیارە سەرۆک حکومەت هەرێم کوردستان، لە کناررەێگ لە کۆڕبەنەگە بڕێگ گردەوبۊن و دیدار گرنگ، وەگەرد وەرپرسەێل باڵای ئەمەریکی و ئەوروپایی و وڵاتەێل عەرەبی و ڕۆژهەڵات ناوەڕاست وە گشتی ئەنجام بەێد.
شاند یاوەرەگەی سەرۆک حکومەت هەرێمی کوردستان پێکهاتگە لە شۆڕش ئیسماعیل وەزیر کاروبار پێشمەرگە، ئاوات شێخ جەناب وەزیر دارایی و ئابووری و سەفین دزەیی وەرپرس فەرمانگەی پەیوەنیەێل دەێشت حکومەت هەرێم کوردستان.
