لە سلێمانی و گەرمیان.. خوەینشاندان وەداوای مووچە و هەڕەشی کارەبابڕین
شەفەق نیوز/ شەوەکی ئمڕوو چوارشەممە، بڕیگ لە فەرمانبەرەیل وەڕێەوبەرایەتی بەشەوکردن کارەبای گەرمیان، لە وەردەم بینای وەڕێەوبەرایەتیەگە گردەو بوین، وەداوای مووچەیلیان، و هەمیش هەڕەشەی بڕین کارەباگە دان.
سەرچەوەیگ لە گەرمیان ئەرا ئاژانس شەفەق نیوز وت: فەرمانبەرەیل دەرفەت ٢٤ ساعەت دانە حکومەت هەرێم کوردستان ئەرا وەرگردن مووچەیان، و هەڕەشی بڕین کارەبا لە خەڵکەگە دان.
لەلای خوەییش، نوینەر ناڕەزایلە لە وەڕێوەبەرایەتی بەشەوکردن کارەبای گەرمیان، محمد سابير ئەرا ئاژانس شەفەق نیوز وت: وەزارەت کارەبا بەرهەمدارتین وەزارەتە و فرەترین پۊل گردەو کەێد، و ستەمە ک فەرمانبەرەیلی وەیجۊرە بوون، ئەراو ئەگەر حکومەت وەماوەی ٢٤ سەعات داوایلمان جیوەجی نەکەێد، ئەوەسا بایکۆت دەوام کەیمن، و لە ناڕەزایی وەردەوام بۊمن.
لەباوەتیگتر، پەیامنێر ئاژانس شەفەق نيوز وت: بڕیگ لە فەرمانبەر و مامووستایل زانکۆی سلێمانی، شەوەکی ئمڕوو، ناڕەزایی لە وەردەم بینای زانکۆگە کردن، هەمیش وەگەرد فەرمانبەرەیل زانکۆی راپەڕین، وەداوای خەرجکردن مووچەی مانگ ئادار گوزەشتە.
پەیامنێرمان وتیش: فەرمانبەرەیل داوای خەرجکردن مووچەیل دیرکەفتییان کردن و داوا کردن هەر ٣٠ رووژیگ مووچەیان بەشەو بکەن، و هەمیش داوا لە حکومەت کردن مووچەی مانگ نیسانیش بیەن چۊنکە ئەوەسا مانگەگە تەواو بوی.
لە چینیگ هاوشیوە، خوەیبەخشەیل وەزارەت تەندروسی بایکۆتیان رەسیە چوارەم دووژ، وەداوای دامەزراننیان.
