زیاتر لە ٢٩٠ تاسیان لە سلێمانی و گەرمیان
شەفەق نیوز/ فەرمانگەی تەندروسی سلێمانی، ئمڕوو سێشەممە، بەرزەوبوین شمارەی تۊشهاتنەیل تاسیان لەوەر خوەڵوتوزەگە ئەرا زیاتر لە ٢٩٠ کەس وەماوەی ٢٤ سەعات گوزەشتە راگەیان.
تەندروسی سلێمانی لە بەیاننامیگ رەسیە ئاژانس شەفەق نیوز وت: خوەڵوتوزەگە هیشت زیاتر لە ١٣٠ کەس بەکفنە بەشەیل فریاکەفتن لە (خەسەخانەی شار، خەسەخانەی دکتۆر جەمال ئەحمەد رەشید ئەر مناڵ) لە دویەکە دووشەممەو، و دیاری کرد ک شمارەیگ لەلیان تەنگەهانس بوین و چارەسەری وەرگردن.
ئیدارەی تەندروسی گەرمیان، شەوەکی ئمڕوو، توومارکردن ١٣٣ تاسیان لەوەر خوەڵوتوزەگە راگەیان ک داگە سلێمانی و ئیدارەی گەرمیان و بەشیگ لە ناوچەیل هەڵەبجە،
و دیاری کرد ک ٧٣ تاسیان لە خەسەخانەی شەهید هەژار لە کەلار توومار کریا، و ٢٧ تاسیان لە خەسەخانەی شەهید خالد گەرمیان لە کفری، و ٣٣ لە خەسەخانەی د.قاسم لە ناحیەی ڕزگاری، و چەمچەماڵیش ٣٠ تاسیان لە خوەڵوتوزەگەی دویەکە توومار کرد.
ئاسۆ کەمال وەڕیەوبەر کەشوهەوا و رەوانگەی زەویلەرزە لە سلێمانی، ئمڕوو سێشەممە، مەزەنە کرد خوەڵوتوزەگە تا کۆتایی ئی هەفتە بمینێد، وەگەرد داوەزین هاز خوەڵوتوزەگە لە نیمەڕو ئمڕوو.
