لە دیداریگ وەگەرد رۆمانسکی.. نێچیروان بارزانی: وەردەوامی ناکۆکی بەغداد و کوردستان لە بەرژەوەنی عراق نییە
وەگورەی بەیاننامەیگ لە سەرۆکایەتی هەرێم کوردستان، هەردوگ لایەنەگە لەناو دیدارەگە باس رای خوەیان لەباوەت پەیوەندیەیل عراق و ئەمریکا و هەرێم کوردستان کردن، هەمیش گفتوگۆ وەخاتر چارەکردن گرفتەیل ناوەین هەولێر و بەغدا وەتایبەت لەبان باوەت بودجە و مووچەی فەرمانبەرەیل هەرێم کوردستان و رەوشەیل عراق و هەرێم کوردستان.
هەردوگ لایەنەگە دووپات لە هەسی گفتوگۆ بیناکەر لەناوەین حکومەت فیدڕاڵ عراق و حکومەت هەرێم کردن، وەخاتر رەسین ئەرا لەیەکفامستن هاوبەشیگ، و چارەکردن گرفتەیل گیرهاتگ ناوەینیان، وەوەگ مافەیل دەستووری ئەرا گشتی مسۆگەر بکەێد و مقیەتی لە ئاسایش و ئارامی سیاسی وڵاتەگە بکەێد.
سەرۆک نێچیروان بارزانی دووپات لە گرنگی جیوەجیکردن سیستەم فیدڕاڵی لە عراق کرد، وەو جویرە کە لەناو دەستوور هاتیە، وتیش؛ بایەسە وەگەرد هەرێم کوردستان جویر هەرێمیگ فیدڕاڵ رەفتار بکریەێد، و وەردەوامی گیچەڵ و گرفتەیل ناوەین حکومەت فیدڕاڵی عراق و حکومەت هەرێم کوردستان لە بەرژەوەنی وڵاتەگە نییە.
هەردوگ لایەنەگە هاوڕا بوین لە گرنگی چارەکردن گرفتەیل و دابینکردن شایستەیل دارایی هەرێم کوردستان وەگورەی یاسا و رێککەفتنەیل، و دووپات لە یەکگردن و یەکڕزی ناوەین لایەنەیل سیاسی لە هەرێم کوردستان کردن، وەتایبەت ناوەین پارتی و یەکێتی.
دەرفەتەیل وەکارخستن سەرمایەیان و بەرهەمهاوردن بیگانە و ناوخوەیی، و قایمکردن کەرت تایبەت لە عراق و هەرێم کوردستان، و رەوش ئێزدیەیل و گرنگی جیوەجیکردن رێککەفتن گونجیان رەوشەیل شنگال ناوەین حکومەت هەرێم کوردستان و حکومەت فیدراڵی عراق، و گەشەیل ناوچەگە وەشیوەی گشتی باسەیل ناو ئەو دیدارە بوین.
