لە جەژن.. مەزەنەی هاتن ٣٠٠ هەزار گەشتیار ئەرا ناو پارێزگایل هەرێم کوردستان
شەفەق نیوز/ دەزگای گەشتوگوزاری لە حکومەت هەرێم کوردستان، ئمڕوو یەکشەممە، مەزەنەی هاتن ٣٠٠ هەزار گەشتیار لەماوەی جەژن قوربان ئەرا ناو گشت پارێزگایل هەرێم کوردستان کرد.
ئەمەل جەلال خانمە سەرۆک دەزگاگە ئەرا ئاژانس شەفەق نیوز وت: وەگورەی بنەمایل وەڕێەوبەرایەتیەیل گشتی گەشتوگوزاری لە پارێزگایل هەرێم کوردستان، هاتن ١٠٠ هەزار گەشتیار ئەرا هەر پارێزگایگ لەماوەی جەژن قوربان کریەێد.
ئەمەل خان وتیش: لەماوەی نیم یەکەم ئی ساڵە، زیاتر لە ٣ مەلیۆن گەشتیار هاتە ناو هەرێم، ومەزەنە کەیمن لە نیم دویەم ئمساڵ زیاتر لەی شمارە باێد، لەوەر هوونکی کەشوهەوا و هەسی شوینەیل گەشتوگوزاری وسەیرانگایل لە هەرێم کوردستان.
خانمە سەرۆک دەزگای گشتی گەشتوگوزاری داوا لە هیزە ئەمنیەیلە کرد وەشیوی رەنگینیگ پیشوازی لە گەشتیارەیل بکەن.
هەمیش دووپات لەگرنگی ئەوە کرد ک چشتەیل و کرا هوتێل و چیشتەخانەیل لەماوەی جەژن گرانەو نەکەن.
