فلپین ئارازو کردنەوەی قونسڵیەیگ لە هەولێر دیرێد
شەفەق نیوز/ باڵوێز فلپین لەلای عراق، ئمڕوو یەکشەممە، لە چەوپیکەفتنی وەگەرد جیگر سەرۆک پەرلەمان کوردستان، باس لە ئارازو وڵاتەگەی کرد وە کردنەوەی قونسڵیەیگ لە هەولێر پایتەخت هەرێم کوردستان.
سەرۆکایەتی پەرلەمان کوردستان لە بەیاننامەیگ رەسیە ئاژانس شەفەق نیوز وت: هێمن هەورامی جیگر سەرۆک پەرلەمان، ئمڕوو، پێشوازی کرد لە جینو روسو باڵوێز فلپین لەلای عراق وشاند یاوەری.
ودیاریکرد ک هەورامی رووشنایی خستە بان کار وئەرکەیل پەرلەمان لەلایەن یاسایی وچەودیری، و ئاماژە کرد لە پێکهاتەیل سیاسی ونەتەوەیی وئاینی لە پەرلەمان.
بەیاننامەگە وتیش ک لەتەوریگ تر لە چەوپیکەفتنەگە هەورامی دووپاتکرد لە گرنگی وەهێزکردن پەیوەندیەگان لە ناوبەین فلپین و هەرێم کوردستان وهەمیش پەیوەندیەگان لەناوبەین هەولێر وبەغداد، ورەوشە تەندروسیەگان ونواگردن ڤایرۆس کۆڕۆنا و کاریگەریە ئابووریەکان ئی پەتا لە جهان.
بەیاننامەگە ئاماژە کرد ک باڵوێز فلپین باس لە خوەشحاڵی خوەی کرد لە سەردانەگە وەگەشەی هەرێم کوردستان، ولە خود وەختەگە ئومیدخواز بوی ک پەیوەندیەگان لەناوبەین وڵاتەگی و هەرێم کوردستان گەشی گەورایگ وەخوەی بوینێد.
هەمیش بەیاننامەگە ئاماژە کرد ک باڵوێز فلپین دووپاتکرد لە تەقەلاگانی ئەرا کردنەوەی قونسڵیەیگ یا نووسینگەیگ لە هەرێم کوردستان وەئامانج بتەوکردن پەیوەندیە دووانیەگان و چەودیری خەڵک وڵاتەگەی لە هەرێم کوردستان.
