عراق 5 پلە چوودە وەر لە لیست دەوڵەمەندترین وڵاتەیل جەهان ئەرا ساڵ 2026
شەفەق نیوز ـ بەغدا
عراق کەفتە پلەی 109ی جەهانی لە ناو 189 وڵات لە ناو لیست دەوڵەمەنترین وڵاتەیل جەهان ئەرا ساڵ 2026، وەپای پلەبەندی گۆڤار Global Financeی ئەمریکی، وە توومارکردن بەش تاک لە بەرهەم ناوخۆیی گشتی وەپای هاوسەنگی توانای سەنن کە رەسیە 15,359.60 دۆلار ناودەوڵەتی.
وەپای پلەبەندییەگە کە ئاژانس شەفەق نیوز ئاگاداری بوی، عراق 5 پلە چووە وەر بەراورد وە ساڵ 2025، هنای لە پلەی 114ی جەهانی بوی.
لە ئاست عەرەبیش، قەتەر هاتە بان لیستەگە، وە دویای ئیمارات، ئمجڵ سعودیە و بەحرێن و کوێت و عومان و مسڕ و جەزائیر و لیبیا، لە وەختیگ عراق بویە دەیەم لە ئاست عەرەبی، وەدواییا هەریەک لە تونس و لوبنان و ئوردن هاتن.
پلەبەندییەگە پشت وە بەش تاک لە بەرهەم ناوخۆیی گشتی وەپای هاوسەنگی توان سەنین بەسێد، کە پەیمانەیگە جیاوازی هەڵکشان نرخەیل و تێچگ کەلوپەل و خزمەتگوزارییەیل لە ناوەین وڵاتەیل لەوەر چەو گرێد، وە ئامانج ئەنجامدان بەراوردیگ لە ناوەین ئاستەیل ژیان و توان سەنین لە ئابوورییە جیاوازەیل.
لە ئاست جەهانیش، سینگاپوور هاتە بان لیستەکە وە ئەنجامیگ کە رەسیە 156,755.35 دۆلار ناودەوڵەتی ئەرا هەر تاکیگ، لەدویایی لوکسمبورگ وە 152,966.48 دۆلار، ئمجا ئێرلەندا وە 152,632.06 دۆلار، لە وەختیگ هەرێم ماکاو کارگێڕی تایبەت بویە چوارەم، و قەتەر پەنجەم، و نەرویج شەشەم، و سویسرا حەفتەم.
راپۆرتەگە دیاری کرد کە بەرزەوبوین بەش تاک لە بەرهەم ناوخۆیی گشتی وەپای هاوسەنگی توان سەنین وە مانا خوەشگوزەرانی گشت دانیشتووان نییە وە هەمان ئاست، چوینکە توەنێد کاریگەری لەبان ئاست نایەکسانی بەشەوکردن داهات، بیجگە لە سروشت ئابوورییەیل و پەناگەیل باج، کاریگەری بنەێد لەبان هویردی وەکارهاوردن ئێ پەیمانە ئەرا پەیمانەکردن ئاست ژیان دانشتگەیل.
