شەرع فەرمانیگ دەرکەێد ئەرا دیاریکردن "مەزڵووم عەبدی" چۊ راوێژکار سەرۆکایەتی

شەفەق نیوز - دیمەشق

سەرۆک سووری ئەحمەد شەرع، ئیوارەی پەنجشەممە، مەرسوومیگ دەرکرد ئەرا دیاریکردن مستەفا خەلیل عەبدی، کە ناسیایە وە ناو مەزڵووم عەبدی، چۊ راوێژکار لەلای سەرۆکایەتی کۆمار، لە گامیگ کە تیەێد دۊای چەن رووژیگ لە راگەیانن هەڵوەشانن هیزەیل سووریای دیموکرات "هەسەدە" و کووتاییهاوردن وە بۊینی چۊ هیزیگ سەربازی سەروەخوەی.

عەبدی، لە 25 ئاب ئیسە لە کۆشک گەل لە دیمەشق، خەوەر دا لە کووتاییهاتن ئەرک هیزەیل سووریای دیموکرات و هەڵوەشاننی چۊ هیزیگ سەربازی سەروەخوەی، دۊای تەواوبۊن پرۆسەی تیکەڵکردن پێکهاتەیلی لەناو دامەزراوەیل دەوڵەت و سوپای سووریا، و وت کە وڵاتەگە چوودە قۆناغیگ نوو کە ناونیشانی ئاشتی و بەشداریکردنە لە بونیادنان سووریا.

راگەیاننەگە دۊای گردەوبوینیگ هات کە عەبدی وەگەرد شەرع لە دیمەشق گردەو کرد ئەرا باسکردن لەوەگ مەنیە لە دۆسیەیل تیکەڵکردن و رێکخستنەیل قۆناغ بانان، دۊای زنجیرەیگ لە رێککەفتنەیل کە دەس کرد وە رێککەفتن 10 ئازار/ مارس 2025، کە دەق لەبان تسکەڵکردن دامەزراوە مەدەنی و سەربازییەیل لە باکوور خوەرەڵات سووریا لەناو ئیدارەی دەوڵەت، و مسۆگەرکردن مافەیل کورد لە هاووڵاتیبۊن و بەشداریکردن سیاسی و مافە دەستوورییەیل دا.

 جیوەجیکردن رێڕەوەگە لە ساڵ 2026 کەفتە ری، کە دیمەشق و "هەسەدە" لە 29 کانوون دۊەم/ یەنایەر رەسینە رێککەفتنیگ گشتگیر ئەرا وسانن تەقەکردن و دەسوەپیکردن وە پرۆسەی تیکەڵکردنیگ سەربازی و کارگێڕی، کە هیزەیل و دامەزراوەیل و دەروازەیل و دامەزراوە ناسکەیل لە باکوور خوەرەڵات وڵاتەگە لەخوەی گرد، وەرجە ئەوەگ عەبدی لە 21 ئاب تەواوبۊن پرۆسەی تیکەڵکردنەگە راگەیەنێد، و دۊای چوار رووژ "هەسەدە" وە شیوەیگ فەرمی هەڵوەشیەێد.

 یەکلاییکردن سیاسی و سەربازی هاوەخت بۊ وەگەرد گامەیلیگ کە دیمەشق وەرەوانوەر دۆسیەی کوردی جیوەجی وەر، دیارتریانیان مەرسووم شمارە 13 دەرچگ لە کانوون دۊیەم/ یەنایەر گوزەشتەس، کە هاووڵاتییە سوورییە کوردەیل چۊ بەشیگ رەسەن لە گەل سووری هەژمار کرد، و دان وە ناسنامەی فەرهەنگی و زوانیان نا، و ری دا وە فێرکردن زوان کوردی، بیجگە لە چارەسەرکردن شوینەوارەیل سەرژمێری حەسەکە ئەرا ساڵ 1962 و دیاریکردن جەژن نەورووز وە پشوو فەرمی لە وڵاتەگە.