سلێمانی میوانداری لووتکەی نیشتمانی دویەم کارسازیی کەێد (وینە)
شەفەق نیوز- سلێمانی
لووتکەی نیشتمانی دویەم کارسازیی لە سلێمانی، ئمڕوو شەممە، وەڕێوە چگ، تا سەکۆیگ نیشتمانی دروسبکەێد ئەرا پاڵپشتی گەنجەیل عراق لە خاوەن بیرۆکە و پڕۆژە کارسازەیل، و بەسانیان وە لایەنەیل حکومی و کەرت تایبەت و وەبەرهێنەرەیل، وە ئامانج ئاڵشتکردن بیرۆکەیلیان ئەرا پڕۆژەیل جیوەجیکریاگ لە بازاڕ.
وەڕێوەبەر گشتی لووتکەگە بەسۆز محەمەد، ئەرا ئاژانس شەفەق نیوز وت: ئی لووتکە ئەمساڵ وە وەشان دویەم خوەی لەبان ئاست نیشتمانی رێک خریەێد، وە سەرپەرشتی وەزیر گەیانن لە حکومەت فیدراڵی مستەفا سەنەد، و دیاری کرد چالاکییەیلی بەشداریکردن گەنجەیل لە 19 پارێزگایل عراق وەخوەی دی.
دیاری کرد، لووتکەگە ئامانجی گردەوکردن ئەو گەنجەیلەس خاوەن بیرۆکەیل کارسازین، و دابینکردن مەشق هەوەجەکریاگ ئەرایان، بیجگە رەخسانن دەرفەت لە وەردەمیان ئەرا پڕۆژەیلیان وە لایەنەیل حکومی و تایبەت و دامەزراوەیل پەیوەنیدار، وە جۊریگ بەشداری لە پاڵپشتیکردن و خستنەیان ئەرا ناو بازاڕ کار بکەێد.
ئاشکرا کرد، لووتکەگە پێشوازی لە 25 گەنج لە پارێزگایل جیاجیای عراق کردگە، وەپای میکانیزمەیل دیاریکریای هەڵوژریانە، و مەشق وەپێیان دریاس لەبان ئەوزەڵداین هویرمان و پڕۆژەیلیان، تا رەسین وە پێشکەشکردنیان لە وەردەم لایەنەیل پەیوەنیدار و وەدەسهاوردن دەرفەتەیل پاڵپشتی و وەبەرهێنان.
محەمەد دووپات کرد رێکخسن لووتکەگە لە چوارچمگ تەقەلایلە ئەرا تواناسازی گەنجەیل عراق، و بتەوکردن دەرفەتەیلیان لە ئاڵشتکردن هیرمان داهێنەرەیل ئەرا پڕۆژەیل راسەقینە کە بەشداری لە چالاککردن ئابووری و دابینکردن دەرفەتەیل کار کەن.
