سەرۆک هەرێم کوردستان وەگەرد شاندیگ لە پەرلەمان ئەوروپا گردەو بوود
شەفەق نیوز/ نێچیروان بارزانی سەرۆک هەرێم کوردستان، ئمڕوو چوارشەممە، پیشوازی لە شاندیگ لە پەرلەمان یەکێتی ئەوروپا وە سەرۆکایەتی ناتالی لویزۆ سەرۆک دەسەی ئاسایش و وەرگری کرد.
سەرۆکایەتی هەرێم کوردستان لە بەیاننامیگ رەسیە ئاژانس شەفەق نیوز وت: لە چەوپیکەفتنەگە شاندە میوانەگە وت: ئامانج سەردانی ئەرا هەرێم کوردستان ئەرا لەنزیکەو نووڕستن رەوشەیل ناوچەگە هاتیە، وباس گرنگی ئارامی ناوچەگە لەلای ئەوروپا کرد، و وەبەرزی ئەرزشدار رووڵ وقوربانی وپاڵەوانیەیل پێشمەرگەی کوردستان لەجەنگ داعش کرد، ونووڕین راستەقینەی هەرێم کوردستان ئەرا رەوشەیل ناوچەگە.
لەلای خوەییش، سەرۆک نێچیروان بارزانی دەسخوەشی لە هاوکاری و دەسمیەتیەیل مرۆیی و سەربازی دەوڵەتەیل یەکێتی ئەوروپا ئەرا هەرێم کوردستان وپێشمەرگە لە چوارچێوەی هاوپەیمان ناودەڵەتی کرد لەناو ئەو جەنگ سەختە دژوە داعش، و وەبەرز هەڵسەنگاندن هەماهەنگی ناوبەین پێشمەرگە و سوپای عراق لەناوچەیل ١٤٠ کرد لەنواگردن مەترسیەیل، و وەردەوامی هاوکاری وپاڵپشتی دەوڵەتەیل یەکێتی ئەوروپا ئەرا عراق و هەرێم کوردستان لە چینەیل سیاسی و ئابووری وکۆمەڵایەتی و خوەنەواری وە کار گرنگیگ دانا.
دەربارەی گرفتەیل ناوبەین هەولێر و بەغدا، نێچیروان بارزانی جەخت لە چارەسەرکردن گرفتەیل لەبنەمای دەستوور عراق ولەڕی گفتوگۆکردن کرد، و باس نموونەیگ لە نووڕین هەرێم کوردستان ئەرا رەوش گشتی لەناوچەگە کرد، ک خوازێد بوودە نشانەیگ ئەرا ئاسایش و ئارامی لەناوچەگە وچارەی گرفتەیل ناوچەگە وەڕی لەیەکڕەسینەوە بوود.
کار سیاسی لە عراق، وبڕیارەیل دادگای فیدراڵی، هاوکاریەیل دەوڵەتەیل ئەوروپا وکۆمەڵگای ناودەوڵەتی ئەرا دەرچگن لە بەسیان سیاسی ئیسە لە عراق، کاریگەرەیل جەنگ ئۆکرانیا، زیایکردن پەیوەندیەیل یەکێتی ئەوروپا وەگەرد عراق و هەرێم کوردستان، باوەتەیل ماف مرۆڤ ویەکسانی وهاوسەنگی لە ڕەنگاوڕەنگی کۆمەڵایەتی، ئەوانە باوەتەیلیگ بوین لەو چەوپیکەفتنە ک هەرلە نوینەر حکومەت هەرێم کوردستان لە بەلجیکا ونوینەر نویسینگەی پەرلەمان یەکێتی ئەوروپا لە هەرێم کوردستان ئامادەی بوی.
