سەرۆک هەرێم کوردستان دڵنیای ئێزدیەیل کەێد لە تەقەلاداین ئەرا رزگاردن رفیایلیان لە چەنگ داعش
شەفەق نیوز/ نێچیروان بارزانی سەرۆک هەرێم کوردستان، ئمڕوو سێشەممە، پیرووزبایی وە جەژن (چلێ هاڤینێ) لە ئێزدیەیل کرد.
سەرۆک نێچیروان بارزانی لە پەیام پیرووزبایی وت: پیرووزبایی لە خوەشک و برایل ئێزدی لە گشت کوردستان و لە هەر شوینیگ لە جەهان کەم، وە گەرمترین پیرووزبایی وە جەژن (چلێ هاڤینێ، وەتایبەت پیرووزبایی لەوانە کەم ک هیمان هانە ناو کامپەیل ئاوارەیی، ئومید خوازم ئی جەژنە ئارامی وخێر وخوەشی وەردە خوەی بارێد.
وتیش: لە گشت جەژن وبوونەیل، یاد خوەشک و برا ئێزدیەیلمان کەیمن ک وەدەس تیرۆر بوینە قوربانی، و وە ڕێز ئەرا گیانیان سەر چەمنیمن، و دڵنیای خیزان رفیایەیل کەیمن ک ئیمە هایمنە تەقەلای وەردەوامیگ ئەرا پەیاکردن رفیایەیل و گلەوداینیان، وئاشکراکردن چارەنویسیان.
وەرجەیە، سەرۆک هەرێم کوردستان، نویسینگەیگ تایبەت ئەرا رزگاردن رفیایل ئێزدی لە هەردوگ رەگەز و گشت تەمەنەیل واز کرد، و ئی نویسینگە سەرکەفت لە رزگارکردن هەزاران لە رفیایەل لە چنگ داعش، ک هەر خوەی ئەنجامی دا، و نە کۆمەڵگای ناودەوڵەتی ونەیش حکومەت عراق ئەرا ئیجویر کاریگ نەهاتنەسە وەرەو.
لەلای خوەییش، مەسرور بارزانی سەرۆک حکومەت هەرێم کوردستان، پەیامیگ پیرووزبایی ئەرا ئێزدیەیل وە خود بوونەگە کلکرد.
لە پەیامەگە وت: ئی بوونە کەیمنە دەرفەتیگ تا دووارە لەبان پابەندی حکومەت هەرێم کوردستان دووپات بکەیمن ک گشت رەنجیگ ئەرا ئەوەگ شایستەی خوەشک و برایل ئێزدیە لە خزمەتگوزاری و سووکەوکردن زیانیان پیشکەش کەیمن.
