سەرۆک حکومەت هەرێم کوردستان: هەمیشە بویمنە سەرچەوەی ئارامی ئەرا ناوچەگە
شەفەق نیوز/ مەسرور بارزانی سەرۆک وەزیرەیل هەرێم کوردستان، ئمڕوو سێشەممە، پیشوازی لە کایسا ئۆلنجرن خانمە وەزیر وەرگری هۆڵەندا و شاند یاوەری کرد.
نویسینگەی راگەیانن مەسرور بارزانی وت: خانمە وەزیر باس پەیوەندییگ قایم ناوبەین هۆڵەندا و هەرێم کوردستان کرد، و دووپات لە وەردەوامی هەماهەنگی ئەمنی و هاوکاری سەربازی و پشتگیریکردن وڵاتەگەی ئەرا هیزیەل پیشمەرگە کرد.
لەلای خوەییش، سەرۆک وەزیرەیل هەرێم کوردستان ئەرزشدار پاڵپشتیکردن هۆڵەندا ئەرا بەرنامەی حکومەتەگەی لە هەمەڕەنگی سەرچەوەیل دهات ئابووری و گرنگیدان وە کەرت کشتوکاڵی کرد.
وەگورەی بەیاننامەگە، دیادرەگە باس گرنگی مقەیەتیکردن ئاسایش و ئارامی هەرێم کوردستان لەناوی کریا، ک هەردوگ لایەنەگە دووپات لە نەفرەتکردن ئەو پەلامارەیلە کردن ک رەسینە زەویەیل هەرێم کوردستان، و جەخت لە گرنگی رێزگردن سەروەری عراق و هەرێم کوردستان و کۆتاییهاوردن وەی پەلامارەیلە کردن.
بەیاننامەگە لە زوان مەسرور بارزانی وت: کوردستان هەمیشە وە سەرچەوەی ئارامی ناوچەگە مینێد، و ئومید دروسکردن پەیوەندیەیل وەگەرد دەوڵەتەیل هاوسا لە بنەمای رێزگردن و هاوسا خاسی و بەرژەوەنی هاوبەش دیرێد.
هەردوگ لایەنەگە لە کۆتایی دیدارەگە باس وەیەککردن هیزیەل پیشمەرگە و چاکسازی لەناو وەزارەت پیشمەرگە و رویوەرویبوین هەڕەشەیل داعش کردن.
