ئیسپانیا پێشنیار لفانەکردن هەولێر وەگەرد مەلەقە کەێد
شەفەق نیوز/ باڵوێز ئیسپانیا لەلای عراق، ئمڕوو یەکشەممە، پێشنیار کرد شار هەولێر پایتەخت هەرێم کوردستان بوودە لفانەی شار مەلەقەی ئیسپانی، و پارێزگار هەولێر پێشوازی لە پێشنیارەگە کرد.
فرسەت سوفی پارێزگار هەولێر لە بەیاننامەیگ ئاژانس شەفەق نیوز چەودیری کرد وت: ئمڕوو پێشوازی کرد لە خوان خوسیه ئەسکوبار باڵوێز ئیسپانیا لەلای عراق، وئاماژە کرد ک ئەسکوبار ئومیدخواز بوی ک سەردانەگەی ئەرا هەولێر بوودە هووکاریگ لە بتەوکردن پەیوەندیەگان وەگەرد مەدرید.
وەگورەی بەیاننامەگە، باڵوێز ئیسپانیا دووپاتکرد ک تەقەلایلیان دان ئەرا کردنەوەی باڵیۆزخانەی سەرەکی ئەرا ئیسپانیا لە هەولێر، بەڵکم ئەو تەقەلایلە سەرنەکەفتن، ودیاریکرد ک قونسڵیەی شانازییگ لە هەولێر هەس، ولەڕی ئەوە پەیوەندیە رووشنهویرەگان گەشەکردن، وئومیدخوازی لە گەشەکردنی لە چینەیل ئابووری و بازرگانی وبەرهەمهاوردن.
بەیاننامەگە ئاماژە کرد ک باڵوێز ئیسپانیا پێشنیار واژووکرن رێککەفتن لفانەکردن ناوبەین مەلەقە و هەولێر پایتەخت هەرێم کوردستان کرد.
پارێزگار هەولێر باس لە خوەشحاڵی خوەی کرد لەو پێشنیارە، وراگەیان ک ئیدارەی پارێزگای هەولێر جوور ناوەندیگ ئابووری و سیاسی گرنگیگ لە عراق ئامادەیە ئەرا پێشکەشکردن گشت ئاسانکاریەگان ئەرا گەشەکردن پەیوەندیە ئابووری و پیشەسازیەگان لەناوبەین هەردوگلا.
سوفی وتیش؛ دەرەیل هەولێر وازن وئامادەس ئەرا پێشوازیکردن لە بەهەمهاوردنە بیگانەگان و دابینكردن دەرفەتەگان لە گشت چینەگان.
