زەخمداری دوو مەدەنی وە بمباران تورکیا لە شیلادزێ
2021-09-02T14:15:00+00:00
شەفەق نیوز/ دوو مەدەنی، ئمڕوو پەنجشەممە، وە بمباران ئاسمانی تورکیا لەبان ناوچەی شیلادزێ سەروە قەزای عمادیە لە باکوور پارێزگای دهۆک زەخمدار بوین.
چالاکوان مەدەنی ئیقبال دۆسەکی ئەرا ئاژانس شەفەق نیوز وت: دوو مەدەنی لەناو بووسان خوەیان کەفتنە وەر بمباران تورکیا لەبان ئاوای سیدان دویای نیمەڕو ئمڕوو زەخمدار بوین.
و دیاری کرد ک بمبارانەگە لەبان پەکەکە بوی ک هانە ناو ئە. ئاوایە، و زەخمدارەیلە یەکیگیان وەناو حاجی عەبدولڵا ٥٥ ساڵان بوی و ئەوەکە سابیر عومەر ٤٥ ساڵان، وتیش: هەردوک زەخمدارەگە وەرەو خەسەخانە بریان.
