ئەرا دویەمین رووژ.. سوپای تورکیا پەلامار کوێەی مەتین دەێد لە دهۆک
2023-01-09T11:14:05+00:00
وتشەفەق نیوز/ سوپای تورکیا، ئمڕوو دووشەممە، تووپواران کوێەی مەتین لە قەزای عمادیە باکوور پارێزگای دھۆک کرد، و ئەوە ئەرا دویەمین رووژە.
سەرچەوەیگ ئەمنی ئەرا ئاژانس شەفەق نیوز وت: هیزەیل سوپای لە ناحیەی بامرنی، وەرجە نیمەڕو ئمڕوو، بومبواران ناوچەیلیگ لە کوێەی مەتین کردن.
سەرچەوەگە وتیش: پەلامارەگە شوینەیل پەکەکە لە کوێەی مەتین کردە ئامانج.
دویەکە یەکشەممە، تووپ تورکیا پەلامار شوینەیل پەکەکە لە کوێەی مەتین لە قەزای عمادیە باکوور پارێزگاگە دان.
سەرچەوەگە ئەرا ئاژانس شەفەق نیوز وت: گولەی تووپ وەلایەن هیزەیل تورکیا لە فڕۆکەخانەی بامرلی وەشیا، ک زبرە خستە ناو خەڵک ناحیەی بامرلی باکوور پارێزگای دھۆک.
فڕۆکەیل تورکیا، هەمیش بومباران شوینەیلیگ لە ئاواییگ لە ناوچەی کوێەی کارە لەبان قەزای عمادیە کردن.
