رویوەرویبوین ناوبەین پەکەکە وهیزەیل تورکیا نزیک خاڵیگ سەربازی باکوور دهۆک

شەفەق نیوز/ رویوەرویبوین جەکدار کەفتە ناوبەین سوپای تورکیا وئەندامەیل پەکەکە، ئمڕوو پەنجشەممە، لە بەرزاییەیل بان ئاواییگ لە قەزای عمادیە باکوور پارێزگای دهۆک. 

سەرچەوەیگ ناوخوەیی ئەرا ئاژانس شەفەق نیوز وت: رویوەرویبوینەگە لە نزیک خاڵیگ سەربازی تورک لە بەرزاییەیل بان ئاوایەیل "سکێری وسەرکلی" لە ناوچەی "نهێلی" لە قەزای عمادیە قومیا، ک هەلیکۆپتەر سەربازی تورک هاتنە ناو جەنەگە و پەلامار دەورگرد خاڵە ئەمنیەگە دا، وەبی زانستن ئەنجامەیل. 

لەلایگتر، فڕۆکەیل تورکیا وەرجە کەمێگ بمباران کویەیگ لەبان ئاوای "کاریای" لە ناحیەی جمانکی سەروە قەزای عمادیە کردن. 

خود سەرچەوەگە وت: گورز ئاسمانی تورکیا لە ناوچەیل نیشتەجیبوین دویر وناوچەیل گەشتوگوزاری دویر بوی.