پەرلەمانتاریگ کوردستانی هوشداری لە کارەساتیگ مرۆیی لە سلێمانی دەێد
شەفەق نیوز/ عەلی حەمە ساڵح سەرۆک دەسەی وزە لە پەرلەمان کوردستان، ئمڕوو چوارشەممە، هوشداری لە قومیان کارەسایتیگ مرۆیی لە پارێزگایل سلێمانی و هەڵەبجە، وئیدارەیل راپەڕین و گەرمیان دا، لەوەر وسیان پڕۆژەیل خزمەتگوزاری لەناویان.
ساڵح لە کۆنگرەیگ رووژنامەوانی لەناو بینای پەرلەمانی کوردستان وت: پڕۆژەیل خزمەتگوزاری لە پارێزگای سلێمانی و هەڵەبجە وئیدارەی راپەڕین و گەرمیان لەوەر خەرجنەکردن پویلیان لە بوودجەگە پەکیان کەفتیە.
وتیش: ئەوەسا لە مانگ ئایندە وەزارەتەیل لە سلێمانی کەفنە وەر گیچەڵیگ لە بەشەوکردن مووچە، چوینکە ئەگەر پویل لە بەغدادەو نەهات؛ بایەتە پارێزگاگە پشت وەداهاتەیل خوەی بوەسێد، وهەمیش هەولێر و دهۆک وەیجۊرە، ک هیلێد پڕۆژەی خزمەتگوزاری جویر ئاو وکارەبا نەوود، ودووارە گرفت مووچە دەسوەپی کەێد.
ساڵح وتیش: ئەو سنوورە ک وەپی ئویشن سلێمانی، کەفتیەسە وەر کارەساتیگ لەلای خزمەتگوزاری و بڵاوبوین پیماری لەوەر وسیان گشت پڕۆژەیل.
سەرۆک دەسەی وزە لە پەرلەمان کوردستان دووپات کرد ک چارەگە هالە ئەوە ک حکومەت هەرێم کوردستان وەرپرس بوود لەبان گشت داهاتەیل ناوخوەیی و وەیەکسانی لەبان ناوچە و شارەیل هەرێم کوردستان بەشی بکەێد.
