خەرجکردن نزیکەی ٣ ملیار دینار ئەرا پڕۆژەیل خزمەتگوزاری لە سلێمانی
شەفەق نیوز/ وەزارەت شارەوانی و گەشتوگوزار لە حکومەت هەرێم کوردستان، ئمڕوو دووشەممە، راگەیان خەرجکردن نزیکەی سێ ملیار دینار ئەرا پڕۆژەیل خزمەتگوزاری و گەشەکردنیان لە پارێزگای سلێمانی، لەماوەی ساڵ ٢٠٢٢.
وەزارەتەگە لە بەیاننامیگ رەسیە ئاژانس شەفەق نیوز وت: خەرجکردن ئی پۊلەیلە لەبان خاسەوکردن و نووەکردن جادەیل و گەشەکردن رەسین ئاو و وەکارخستن لۊلەیل ئاو رووشن، و دابینکردن تووڕ ئاوەڕۆی و چاڵکەنین بیرەیل، و دارناین، و چینەیلیگتر لە خزمەتگوزاری خەرج کریان.
قەوارەی پڕۆژەیل بەرهەمهاوردن ک لە سەردەم کابینەی حکومەتی نۆەم لە هەرێم کوردستان جیوەجی کریان، لە ١١ ملیار دۆلار رەد کرد، ک وەلایەن کۆمپانیایل بیگانە و ناوخۆیی و تێکەڵا جیوەجی کریان.
لە ساڵ ٢٠٢٠ ، شمارەی پڕۆژەیل جیوەجیکریای رەسیە ٧٧ پڕۆژە وە سەرمایەیگ رەسیە دو ملیار و ١٨ مەلیۆن و ٢٧١ هەزار و ٢٥٦ دۆلار، و لە ساڵ ٢٠٢١ ، ٦٩ پڕۆژە وە ٨ ملیار و ٥٠٩ مەلیۆن و ٧٦٥ هەزار و ٩٨٦ دۆلار جیوەجی کریا، و ئی ساڵە ١٦ پڕۆژە وە سەرمایەی ١٢٤ ملیۆن و ٥٨ هەزار و ٢٨٢ دۆلار جیوەجی کریا.
