ئەرا نواگردن کولێرا ئەمریکا دەرمان ئەرا سلێمانی کل کەێد

ئەرا نواگردن کولێرا ئەمریکا دەرمان  ئەرا سلێمانی کل کەێد
2022-07-05T09:22:43+00:00

شەفەق نیوز/ ئاژانس ئەمریکی ئەرا پەرەداین ناودەولەتی، ئمڕوو سێشەممە، راگەیان دەسمیەتی زوینەی  دەرمان و پێداویستیەیل پزیشکی ئەرا پارێزگای سلێمانی کلکردیە ئەرا رویوەروی بوین پەتای کولێرا.  

لە بەیاننامی ئاژانسە ئەمریکیەگە ک رەسیە وە شەفەق نیوز راگەیانیە، وە هاوبەشی وەگەرد رێکخریاگ تەندروسی جەهانی بارهەڵگریگ لە دەرمان و پێداویستیەیل پزشکی ئەرا سلێمانی لە هەرێم کوردستان کلکردنە، ئەرا رویوەرویبوین چەوەڕی نەکریاگ کولێرا لە ناوچەگە.  

راگەیانیش، ئەو پێداویستیەیلە ئەرا سلێمانی کلکریایە ئەرا نزیکەی پەنج هەزار کەس بوود ئەرا ماوەی سێ مانگ. 

ئیرەنگە چوار خەسخانە لە سلێمانی پیشوازی لە تویشهاتنەیل زگچین و ئەڵاوردن کەن ک لەوەر کولێرا تویش بوینە. 

لە گوزەشتە رێکخریاگ تەندروسی جەهانی راگەیان، هاوکاری تەندروسی ئەرا سلێمانی کلکەن لەوەر بڵاوبوین کولێرا لە پارێزگاگە. 

لە کۆتایی مانگ ئایار گوزەشتە تەندروسی سلێمانی بڵاوبوین شەپوولیگ زگچین و ئەڵاوردن راگەیان و دویاجار پشتراسیکرد ئەوەگ بڵاو بویە کولێراس.

Shafaq Live
Shafaq Live