رەسین شاندیگ هاوبەش لە وەرگری عراق و هاوپەیمان ناودەوڵەتی ئەرا سلێمانی.. وینە
پەیامنێر ئاژانس شەفەق نیوز لە سلێمانی راگەیان، شاندە سەربازییەگە هاتنە بارەگای هیزەیل ٧٠، وە ئامادەبوین ئەندامەیل مەکتەب سیاسی یەکێتی نیشتمان کوردستان و سەرکردەیل هیزەیل ٧٠ی پێشمەرگە و هیزەیل پاراستن سلێمانی.
وتیش؛ بڕیارە باس لە کار هاوبەش لە ناوچە دابڕیاگەیل پارێزگایل دیالە و کەرکوک بکریەێد، هەرلیوا پرس پیکاتن هەردوگ لیوای هاوبەش لەو ناوچەیلە ناوبەین هیزەیل سوپای فیدراڵی و هیز پێشمەرگە باس بکریەێد.
مانگ شوبات لە ساڵ گوزەشتە، قسەکەر فەرماندەیی ئۆپەراسیۆنە هاوبەشەیل، لیوا تەحسین ئەلخەفاجی، تەواوبوین دروسکردن هەردوگ لیوای هاوبەش ناوبەین سوپا و پێشمەرگە راگەیان.
وەرجەیە، وەزارەت پێشمەرگە گفتوگۆ فراوانیگ وەرد بەغدا کردەێد لەباوەت بە چەکدارکردن دوو لیوای هاوبەش هیزەیل وەگەرد سوپای عراق تا لە ناوچە نا ئارامەیل یا دەورگردی جگیر بوون.
خەفاجی لە بەیاننامەیگ رووژنامەوانی، رەسیە ئاژانس شەفەق نیوز رایگەیان، "ئی دوو لیوا دروس کریانە و ناویان نریاگە، ەوەڕی پەسەنکردن بودجەی فیدراڵی کەن تا بتوەنن ئەرکەیلیان جیوەجی بکەن".
دووپاتیش کردەگە ک رێککەفتن وەگەرد حکومەت هەرێم کوردستان کریاگە، وتیش ئەو دوو لیوا دویای تەواوکردن مەشقی لە ناوچە بۆشاییە ئەمنییەیل جگیر کریەن.
ئەو ناوچەیلە شایەتحاڵی بۆشاییە ئەمنییەیلن - لە نووڕین خەفاجی - وە درویژی ٤٠ کیلۆمەترە، بەڵام هەرێم کوردستان رووبەرەگە فرە لەوە گەورەتر دوینێد.
ئی ناوچەیلە بریتین لە بۆشایی فراوانیگ زەوی ک لە سنوور سوریاوە دەسوەپی کەێد لە خوەرئاوا، وە پارێزگای نەینەوا، وە پارێزگای سەڵاحەدین رەد بوزد، ئیجا کەرکوک، تا رەسێدە دیالە لە سنوور ئیران.
مەسرور بارزانی سەرۆک حکومەت هەرێم کوردستان چەن جاریگ داوای دروسکردن هیزیگ هاوبەش پێشمەرگە و هیزە عێراقییەیل کەێد ئەرا پڕەوکردن بۆشاییە ئەمنییەیل لە ناوچە دابڕیاگەیل.
لە ساڵ 2020 هەولێر و بەغدا رەسینە رێککەفتنیگ وە ئامانج دروسکردن شەش سەنتەر هەماهەنگی هاوبەش ئەمنی ئەرا نواگردن جیماگەیل داعش لە ناوچە دابڕیاگەیل.
