دویای ٦ ساڵ لە بەساننی.. پارتی بارەگاگەی لە کۆبانی دووارە واز کەێد
2021-01-25T16:48:30+00:00
شەفەق نیوز/ پارت دیموکرات کوردستان- سوریا، ئمڕوو دووشەممە، دووار بارەگاگەی لە شار کۆبانی لە ناوچەی ئیدارەی سەروەخوەیی کردەو.
وە ئامادەبوین سەرکردەیل حزبەگان و کەسایەتیلیگ سیاسی و نۆێنەرەیلیگ لە دامەزراوەیل کۆمەڵگای مەدەنی لە شارەگە، دویای نزیکەی شەش ساڵ لە بەساننی وە بڕیار ئیدارەی سەروەخوەیی دووارە واز کریا.
لەی باوەتە موستەفا قادر سەرکردە لە حزبەگە ئەرا ئاژانس شەفەق نیوز وت: دووارە وازکردن نووسینگەیل حزبەیل ئەنجومەن نیشتمانی کوردی جوور یەکەم گامیگ ئەرا رەسینەوەی ناونی حزبەیل ئەنجومەنەگە و ئیدارەی سەروەخوەیی تیەێد، دویای پێشکەفتن خاسیگ لە قۆناغەیل یەکەم و دوویەم لە گفتوگۆەیل کوردی- کوردی.
وتیش؛ پارت دیموکرات کوردستان- سوریا ئومید سەرکەفتن ئی گفتوگۆە دیرێد، ک گامەیل خاسیگ بڕێد، و ئەوەسا دەسکەنە چالاکی و کارە سیاسیەگانیان لە شارەگە وەگەرد ئەو حزبەگان تر لە ئەنجومەن نیشتمانی کوردی.
