ده هزار ماسک ئه‌ڕا ئیلامیه‌یل
شه‌فه‌ق نیوز- جه‌ماعه‌ت (جامیعه) ئیلامیه‌یل مه‌رکه‌ز (وه کورته‌نام ج.ا.م)، لق ژنه‌یله‌ی، وه به‌رپرسی دوکتور مه‌هین عه‌باسی، چالاک مه‌ده‌نی و فه‌رهه‌نگی ئاودانانی، ده شوون هانایه‌تی و کووه‌و کردن کومه‌ک ئه‌ڕای زاڕوومه‌درسه‌یل و سفووڕه‌یل و بێ‌ده‌سهه‌ڵاته‌یل ئیلامی ک وه خاتر که‌مده‌سی و ژاری و هه‌ژاری ته‌وانای خڕین ماسک ئه‌ڕا نواگیری له کورونا نه‌دیرن، هامڕێ دوکتور وه‌فایی یگانه ک به‌نگڵه‌ی ئه‌ڕا ماسک‌سازی ده که‌ره‌ج ناگه و خوه‌ییش خه‌ڵک ئیلامه، نزیکه‌ی یانزه‌هزار ماسک سێ‌لایه مڵتدار ک هن بیمار پیه‌رێزییه، وه په‌تی کردن، ئه‌ڕا ئیلام.
مسته‌فا به‌یگی (رودوس فه‌یلی) به‌رپرس ئی NGOه ک یه ده‌ساڵه ئه‌ڔا گرده‌و بیین و خه‌یرخوازی ئیلامیه‌یل ده ده‌ور یه‌کتره‌کی، بنه‌ڔای نریاگه، وت: ئیمه به‌ش وه حاڵ خوه‌مان، ناوه‌ی خه‌یلێ یه‌کجار و ئه‌ڔا یه ک جواوێ وه بڕێ له هه‌وه‌جه‌یل وه‌رده‌سی خه‌ڵکه‌گه‌مان له لا چشته‌یل ئابووری و کوومه‌ڵایه‌تی و فه‌رهه‌نگی و ژینگه‌پارێزی بده‌یمن، ئی رێکخریاوه خستیمنه‌سه رێ و هیواداریمن له یه‌و لا، خه‌ڵکه‌گه ئه‌ڔا ئه‌نجام داین کاره‌یل گه‌پترێگیش یارمه‌تیمان بده‌ن.
